މި އަހަރުގެ މިހާތަނަށް ސައިބާ ކްރައިމްގެ 814 މައްސަލައެއް ހުށަހަޅާފައިވާ ކަމަށް ފުލުހުން މައުލޫމާތު ދީފި އެވެ.
މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިންސްޕެކްޓާ އޮފް ޕޮލިސް އަޒީފް އައްބާސް ވިދާޅުވީ، މި އަހަރުގެ ތެރޭގައި ހުށަހެޅުނު މައްސަލަތަކަށް ބަލާއިރު ސައިބަރ ޑިޕާޓްމެންޓަށް 814 މައްސަލައެއް ހުށަހަޅާފައި ވާކަމަށެވެ. އެގޮތުން ތެރޭގައި ގިނައީ ސްކޭމްގެ މައްސަލަތައް ކަމަށް އޭނާ ވިދާޅުވި އެވެ. އަދި މިއީ މިދިޔަ އަހަރާއި އަޅާބަލާއިރު 90.2%ގެ އިތުރުވުމެއް ކަމަށާއި، އިތުރުވާން ޖެހުނު ސަބަބުތަކެއް އެބަހުރި ކަމަށް ވިދާޅުވި އެވެ.
"ތަފާސު ހިސާބް ތަކަށް ބަލާއިރު މީގެ 66% އަކީ ސްކޭމްއާ މަކަރާ ހީލަތުގެ މައްސަލަ. ގިނައިން ސްކޭމް ކޮށްފަ ހުރީ އީ ކޮމާސް އާއި، އެކިއެކި ވެބްސައިޓްތަކާއި ވިޔަފާރި ޕްލެޓްފޯމްތަކުގެ ޒަރިއްޔާއިން" … އަޒީފް އައްބާސް
އަޒީފް ވިދާޅުވި ގޮތުގައި، މި މައްސަލަތަކުގެ 10% އަކީ އެކައުންޓް ހެކްކުރުން ފަދަ މައްސަލަތަކެވެ. އަދި 9.6% މައްސަލަތަަކަކީ ބްލެކްމެއިލްއާއި ބުލީކުރުން ހިމެނޭހެން އޮންލައިން ހެރޭސްމެންޓުގެ މައްސަލަތަކެވެ. ބްލެކްމެއިލް މައްސަލަތަކުގެ ތަހުގީގުތަކުގެ ތެރެއިން ރާއްޖެއާއި ރާއްޖެއިން ބޭރުން ސީދާ ދިވެހިންނަށް އަމާޒުކޮށްގެން ބްލެކްމެއިލްކުރުމުގެ އެކި ކުށްތައް ހިންގަމުންދާކަން ފާހަގަކުރެވިފައިވާކަމަށް ފުލުހުންގެ ހިދުމަތުން ބުނެފައިވެ އެވެ. އޭގެ ތެރޭގައި އޮރިޔާން ކާޑު ބޭނުންކޮށްގެން ބްލެކްމެއިލްކުރުމުގެ މައްސަލަތައް ހިމެނެ އެވެ.
އަޒީފް ވިދާޅުވިގޮތުގައި، އެ އިދާރާއަށް ހުށަހެޅިފައިވާ މައްސަލަތަކުގެ ތެރެއިން އެންމެ ބޮޑަށް ކަންބޮޑުވުން އޮތީ ސްކޫލުތަކުގެ ދަރިވަރުންނާއި ބެލެނިވެރިންނާއި ޓީޗަރުންނަށް އަމާޒުކޮށްގެން ހިންގާ ކޮންފެޝަން ޕޭޖުތަކެވެ.
"މި މައްސަލަތަކުގެ ތެރެއިން އަޅުގަންޑު މެނަށް އެންމެ ބޮޑޮ ކޮންސާނަކީ، ސްކޫލްތަކުގެ ނަމުގައި ހިންގާ ކޮންފެޝަން ޕޭޖުތަކުގެ މައްސަލަ. މީ ލޯކަލީ ހިންގާ މައްސަލަ ތަކުގެ ތެރެއިން އަޅުގަންޑުމެން އެންމެ ކޮންސާން ވާ އެއް މައްސަލަ" އަޒީފް ވިދާޅުވި އެވެ.
އެ މައްސަލަތަކުގެ ތެރެއިން ތިން ޕޭޖެއް ފުލުހުންގެ ބެލުމުގެ ދަށަށް ގެނެސް، 19 ޕޭޖެއް ނަގާފައިވާއިރު، އިތުރު 30 ޕޭޖެއްގެ މައްސަލަ ބަލަމުން އަންނަކަމަށް އަޒީފް ފާހަގަކުރެއްވި އެވެ.
