ހުޅުމާލެ ފޭސް 2 ގެ ފަޅުގައި އޮތް ލަގެޖެއްގެ ތެރެއިން މަރާލާފައި އޮއްވާ ފެނުނު 13 އަހަރުގެ ކުޑަކުއްޖާގެ މައްސަލާގައި އެކުއްޖާ މަރާލިކަމަށް ތުހުމަތު ކުރެވޭ 17 އަހަރުގެ ޖަލަށްލުމަށް ޖުވެނައިލް ކޯޓުން ހުކުމްކޮށްފި އެވެ.

ދައުލަތުން އޭނާގެ މައްޗަށް އުފުލީ ގަސްދުގައި މީހަކު މެރުމާއި، ހުއްދަނޫން ގޮތުގައި މީހަކު ހިފެހެއްޓުމާއި މައްޔިތާގެ ބޭނުން ނަހަމަ ގޮތުގައި ކުރުމުގެ ކުށުގެ ދައުވާ އެވެ. އެ ދައުވާތަށް އޭނާގެ މައްޗަށް ސާބިތުވާކަމަށް ކަނޑައަޅާ ޖަލަށް ލުމަށް ހުކުމްކޮށްފައިވަނީ މިމަހުގެ 23 ވަނަ ދުވަހެވެ.

ޖުވެނައިލް ކޯޓުން ވަނީ ގަސްތުގައި މީހަކު މެރުމުގެ ކުށުގެ އަދަބެއްގެ ގޮތުން 16 އަހަރާއި 10 މަހާއި 7 ދުވަހަށް ކުޑަކުދިންގެ ކަރެކްޝަނަލް މަރުކަޒެއްގައި ބަންދު ކުރަން ހުކުމްކޮށްފަ އެވެ. އަދި މައްޔިތާގެ ބޭނުން ނަހަމަ ގޮތުގައި ކުރުމުގެ ކުށުގެ އަދަބެއްގެ ގޮތުން 18 ދުވަހަށް ޖުވެނައިލް ޑިޓެންޝަން ސެންޓަރެއްގައި ބަންދުކުރުމަށް ވެސް ވަނީ އަމުރުކޮށްފަ އެވެ. ހުކުމް ކުރުމުގެ ކުރިން ބަންދުގައި ހޭދަކުރި 4 އަހަރާއި 6 މަހާއި 2 ދުވަސް އުނިކުރުމުން ތަންފީޒު ކުރަންޖެހޭ މުއްދަތަކީ 12 އަހަރާ 4 މަހާއި 5 ދުވަހެވެ. ކައްފާރާއެއްގެ ގޮތުން ވިދިވިދިގެން 2 މަސް ދުވަހު ރޯދަ ހިފުމަށްވެސް ވަނީ އަމުރުކޮށްފަ އެވެ.

މީގެއިތުރުން ހުއްދަ ނޫން ގޮތުގައި މީހަކު ހިފެހެއްޓުމުގެ ކުށުގެ އަދަބެއްގެ ގޮތުން 11 މަހާއި 9 ދުވަހަށް ޖުވެނައިލް ޑިޓެންޝަން ސެންޓަރެއްގައި ބަންދުކުރުމަށް އަމުރުކޮށްފަ އެވެ. އަދި މައްޔިތާގެ ބޭނުން ނަހަމަ ގޮތުގައި ކުރުމުގެ ކުށުގެ އަދަބެއްގެ ގޮތުން 18 ދުވަހަށް ޖުވެނައިލް ޑިޓެންޝަން ސެންޓަރެއްގައި ބަންދު ކުރުމަށް ވެސް އަމުރުކޮށްފައިވެ އެވެ.

17 އަހަރުގެ ކުއްޖާގެ އިތުރުން މި މައްސަލާގައި ޝާމިލުވާ ނ. ލަންދޫ، ބަގީޗާގޭ އިބްރާހީމް ޒިހާންގެ މައްޗަށް ކްރިމިނަލް ކޯޓަށް ހުށަހަޅާފައިވާ މައްސަލާގައި އެކޯޓުން ހުކުމެއް ކުރުމުން މަރުގެ ދިޔައާ މެދު ގޮތެއް ކަނޑައެޅުމަށްޓަކައި ހުށަހަޅަން އަންގާފައިވާ ކަމަށް ވެސް ޕީޖީން ވަނީ ބުނެފަ އެވެ.

13 އަހަރުގެ ކުޑަކުއްޖާ ރަހީނުކޮށްގެން އުޅޭކަމުގެ ރިޕޯޓު ފުލުހުންނަށް ހުށަހެޅުމާ ގުޅިގެން އެ ކުއްޖާ ހޯދަމުންދަނިކޮށް ފެނުނީ 2021 ވަނަ އަހަރުގެ ޖޫންމަހުގެ 21ވަނަ ދުވަހުގެ ރޭ ދަންވަރު 02:38 ހާއިރެވެ. ކުއްޖާ ފެނުނީ މަރާލުމަށްފަހު އެއްލާލާފައި އޮއްވައި ހުޅުމާލޭ ދެވަނަ ފިޔަވަހީގެ މޫދާ ދިމާލުންނެވެ.