ބޭރު ގައުމުތަކުގައި ދިވެހިން ތިބެގެން މަސްތުވާތަކެތި އެތެރެކުރުމަށް މަސައްކަތްކުރާ ކަމަށް ދިވެހި ފުލުހުންގެ އިދާރާއިން ބުނެފި އެވެ.
މަސްތުވާތަކެއްޗާ ދެކޮޅަށް ފުލުހުން ކުރަމުންގެންދަވާ މަސައްކަތްތަކާއި ގުޅޭގޮތުން މައުލޫމާތު ދިނުމަށް ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓާ އޮފް ޕޮލިސް، ހެޑް އޮފް ޑްރަގް އެންޑް ސަބްސްޓެންސް ކޮންޓްރޯލް، އަހުމަދު ނާއިފް ވިދާޅުވީ ފަހަކަށް އައިސް ރާއްޖެއިން ބޭރުގައި، ހާއްސަކޮށް ސައުތު އީސްޓް އޭޝިޔާ ސަރަހައްދުގައި ދިވެހިން ރާއްޖެއަށް މަސްތުވާތަކެތި ފޮނުވުމުގެ މަސައްކަތްތައް ކުރަމުންދާކަން ފާހަގަވެފައިވާ ކަމަށެވެ.
"މި އިންވެސްޓިގޭޝަން ގެ ތެރެއިން ފާހަގަވާ އެހެންކަމަކަށް ބަލާލާއިރު ރާއްޖޭން ބޭރުގައި ދިވެހިން ގާއިމުވެ ހުރެގެން، ހާއްސަކޮށް ސައުތު އޭޝިއާ ހިސާބުން ދިވެހިރާއްޖެއަށް މަސްތުވާތަކެތި ގެންނަން މަސަތްކަތްކުރޭ. މީ މި ފަހަކުން ވަރަށް ފާހަގަކުރެވޭ ކަމެއް." ނާއިފް ވިދާޅުވި އެވެ.
އެގޮތުން އެއާ ކާގޯއާއި ސީ ކާގޯ މެދުވެރިކޮށް އަދި އިލެކްޓްރިކް ސާމާނުތަކުގައި މަސްތުވާތަކެތި ފޮރުވައިގެން ރާއްޖެ ފޮނުވަމުންދާކަމަށް އޭނާ ވިދާޅުވި އެވެ. އޭނާ އިތުރަށް ވިދާޅުވީ ރާއްޖެއިން ބޭރުގައި ސަރަޙައްދީ ގައުމުތަކުގައި ތިބެގެން ރާއްޖެއަށް މަސްތުވާތަކެތި އެތެރެ ކުރާ ތިން ދިވެހިން މިހާތަނަށް ފާހަގަކުރެވިފައިވާކަމަށެވެ. އަދި މިކަން ކުރާ މީހުންގެ ތެރޭގައި ޖިނާއީ އެކި މައްސަލަތަކުގެ ރެކޯޑް އޮތް މީހުން ތިބިކަމަށް ވެސް އޭނާ ވިދާޅުވި އެވެ.
"އެއާ ކާގޯ، ސީ ކާގޯ އަދި ބަދިގެ ސާމާނުތަކުގައި ކޮންސީލް ކޮށްގެން ދިވެހިރާއްޖެއަށް މަސްތުވާތަކެތި ފޮނުވާކަން ފާހަގަކުރެވޭ" އޭނާ ވިދާޅުވި އެވެ.
ނާއިފް ވިދާޅުވީ ގާނޫނުތަކުގެ ތެރެއިން، އަވައްޓެރި ގައުމުތަކާއި އެހެން ގައުމުތަކާއެކު އެ މައްސަލަތައް ބަލަމުންދާ ކަމަށެވެ. އަދި، އެމީހުންގެ ތަހުގީގު ކުރިއަށްދާ މަންޒަރު ފެނިގެންދާނެކަމަށް ނާއިފް ވިދާޅުވި އެވެ.
