އެކި ދާއިރާތަކުން ޒުވާނުން ހިމެނޭހެން "ނޭޝަނަލް ޔޫތު ކޮންފަރެންސް 2025″ މިއަދު ފަށައިފި އެވެ.
މި ކޮންފަރެންސް ފެށުމުގެ ރަސްމިއްޔާތުގައި ޔޫތު މިނިސްޓަރު އިބްރާހިމް ވަހީދާއި އެވުޒާރާގެ އިސްވެރިންނާއި ޔޫތު އެޑްވައިޒަރީ ބޯޑުގެ މެމްބަރުން ބައިވެރިވި އެވެ. ޔޫތު ހަބްގައި ޒުވާނުންގެ ގައުމީ ކޮންފަރެންސް ކުރިއަށްދާނީ ޑިސެމްބަރު 22 އަދި 23 ވަނަ ދުވަހު އެވެ. މި ކޮންފަރެންސްގެ ނިންމުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުވެސް ބައިވެރިވެވަޑައިގަންނަވާނެ އެވެ.
މި ކޮންފަރެންސްގައި އެކި ދާއިރާތަކުން 93 ޒުވާނުން ބައިވެރިވެ އެވެ. މިއަހަރުގެ މިކޮންފަރެންސްގެ އަމާޒަކީ، ޒުވާނުންގެ ހުރި ކަންބޮޑުވުންތައް ބަލާ، އެކަންބޮޑުވުންތަކަށް ވަށާޖެހޭ ހައްލެއް ހޯދުމާއި، ޒުވާނުންގެ ގައުމީ ސިޔާސަތެއް އެކުލަވާލުން ކަމަށް ޔޫތް މިނިސްޓްރީއިން ބުންޏެވެ. މީގެ އިތުރުންވެސް ޒުވާނުންގެ ހިޔާލާއި، މަޝްވަރާ ހޯދުމާއި، ޒުވާނުން ކުރިއެރުވުމަށްޓަކައި މަސައްކަތްކޮށްދިނުމަކީވެސް މިކޮންފަރެންސްގެ ބޭނުމެއް ކަމަށް މިނިސްޓްރީއިން ބުންޏެވެ.
ކޮންފަރެންސް ފެށުމުގެ ރަސްމިއްޔާތުގައި ވާހަކަދައްކަވަމުން ޔޫތް މިނިސްޓަރު ވިދާޅުވީ، މިއަދަކީ ދިގު މާޒީއަކަށްފަހު، ޕްރެޒިޑެންޝަން ޔޫތު އެޑްވައިޒަރީ ބޯޑުން އިސްނަގައިގެން ގައުމީ ފެންވަރެއްގައި ރާއްޖޭގެ ހުރިހާ އަތޮޅުތަކަކުން ޒުވާނުން އައިސް ޒުވާނުންނަށް ގައުމުގައި ފާހަގަކުރެވޭ ކަންކަމަށް އެއްތަނެއްގައި ތިބެ މަޝްވަރާކުރުމުގެ ފުރުސަތު ލިބިގެންދާ ދުވަސް ކަމަށެވެ.
