ވާނުވާ ބަންދުގައި އަހަރު ދުވަސްވީ އެންމެންގެ މައްސަލަ މާޗް މަހުގެ ނިޔަލަށް ނިމޭނެ ކަމަށް މައުލޫމާތު ލިބިވަޑައިގެންފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ހުޅުމާލެ ފޭސް 1ގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި، "ވާނުވާ" ބަންދާ ގުޅޭގޮތުން އާންމުން ކުރި ސުވާލުތަކަށް ޖަވާބު ދެއްވަމުން ރައީސް ވިދާޅުވީ، އަހަރަކަށްވުރެ ގިނަ ދުވަސްވެފައިވާ މިފަދަ މައްސަލަތައް މާޗްގެ ނިޔަލަށް ނިންމޭނެ ކަމުގެ މައުލޫމާތު އެމަނިކުފާނަށް ދެއްވީ ބަންޑާރަ ނައިބު އަހުމަދު އުޝާމް ކަމަށެވެ.
އެގޮތުން، އެއް އަހަރަށް ވުރެ ގިނަ ދުވަސްވީ މައްސަލަތައް މާޗަށް ނިންމުމަށްފަހު، ދެން ހުރި މައްސަލަތައް ވެސް އަވަސްކުރުމަށް މަސައްކަތް ކުރައްވާނެ ކަމަށް ބަންޑާރަ ނައިބު ވިދާޅުވި ކަމަށް ރައީސް ފާހަގަކުރެއްވި އެވެ.
ރައީސް ވިދާޅުވީ، ކުރީން އޮތް ބައްދަލުވުންތަކުގައި ވެސް ވަރަށް ތަފްސީލުކޮށް ވާނުވާ ބަންދުގެ މައްސަލަ އޮތް ގޮތް ސާފުކޮށް ދެއްވާފައިވާނެ ކަމަށެވެ. ރައީސް ވިދާޅުވީ ގޮތުގައި ވާނުވާ ބަންދުގެ މައްސަލަތަކުގައި ބަންޑާރަ ނާއިބުގެ އޮފީހުން ކުރަން ޖެހޭ ކަންކަން އެންމެ ރަނގަޅަކަށް ކޮށްދެމުން ގެންދާނެ ކަަމަށެވެ.
