ސޯޝަލް ހައުސިންގެ ތެރެއިން ދޫކޮށްފައިވާ ފުލެޓުތަކުގެ ކުއްޔާއި ޖޫރިމަނާއަށް ލުއި ގޮތްތައް ހަމަޖައްސައިދެނީ ދައުލަތަށް ގެއްލުން ނުވާނެގޮތަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ، ހުޅުމާލެ ފޭސް 1ގެ ރައްޔިތުންނާ ބައްދަލުކުރެއްވުމަށް ރޭ ބޭއްވި ޖަލްސާއެއްގަ އެވެ. މި ބައްދަލުވުން ބާއްވާފައިވަނީ ސަރުކާރުން ހިޔާ ފްލެޓުތަކުގެ ކުލި ނުދައްކައިގެން އަރާފައިވާ ޖޫރިމަނާތައް މައާފުކޮށްދިނުމުގެ އިތުރުން، އެފްޑީސީގެ ފްލެޓުތަކުގެ ކުލި ކުޑަކޮށްފައިވާ ދަނޑިވަޅެއްގަ އެވެ. ރައީސް ވިދާޅުވި ގޮތުގައި، ސަރުކާރުން މިފަދަ ނިންމުންތައް ނިންމަވާފައިވަނީ ކުއްޔާއި ޖޫރިމަނާ ދެއްކުމުގައި ދަތިތައް ކުރިމަތިވެފައިވާ ރައްޔިތުންނަށް ލުޔެއް ހޯދައިދިނުމުގެ ސިޔާސަތެއްގެ ދަށުންނެވެ.
އެހެންނަމަވެސް، ރޭ ހުޅުމާލެ ފޭސް 1ގެ ރައްޔިތުންނާ އެކު ބޭއްވި ބައްދަލުވުމުގައި ގިނަ މީހުންގެ ކަންބޮޑުވުން ގޮސް ހުއްޓުނީ ސަރުކާރުން ދޫކޮށްފައިވާ ފްލެޓުތަކުގެ ކުލި ނުދެއްކުމުން އަރާފައިވާ ޖޫރިމަނާ މާފުކުރާ ކުރުމަށެވެ. އޭގެ ސަބަބުން ދައުލަތަށް ވެސް ގެއްލުންވެ، ކުލި ނުދެއްކުމުގެ ސަގާފަތެއް އުފެދިދާނެ ކަމުގެ ފުރުސަތު އޮތް ކަމަަށް ގިނަ ބައެއް މީހުން ބުންޏެވެ.
ރައީސް ވިދާޅުވީ، ސަރުކާރުގެ އެކި ހައުސިން ސްކީމްތަކުގެ ދަށުން ފްލެޓު ލިބިފައިވާ މީހުންގެ ޖޫރިމަނާ ވިޔަސް އަދި އެހެން ކަހަލަ ލުޔެއް ވެސް ދެނީ ވަރަށް ބޮޑަށް ދިރާސާ ކުރެއްވުމަށް ފަހު ކަމަށެވެ. އަމުދުން ރާއްޖޭގެ އިގުތިސާދަށް ގެއްލުންވާ ގޮތަށް އެއްވެސް ކަމެއް ނުނިންމަވާ ކަމަށް އެ މަނިކުފާނު ވިދާޅުވި އެވެ.
މީގެއިތުރުން ރައީސްގެ ވާހަކަފުޅުގައި ވަނީ ފްލެޓު ދިނުމުގައި ސިޔާސީ ފިކުރަށް ބަލާކަމަށް ބުނެ ދެކެވޭ ވާހަކަތަކަށްވެސް އިޝާރާތްކުރައްވާފައެވެ. އެމަނިކުފާނު ވަނީ ސިޔާސީ ފިކުރަކަށް ބަލައިގެން އެއްވެސް މީހަކަށް ފްލެޓު ނުދޭކަމަށާއި، އެގޮތަށް ނުވެސް ނިންމާނެކަމަށް ވިދާޅުވެފައެވެ. ރައީސް ވިދާޅުވާ ގޮތުގައި ހުރިހާ ކަމެއްވެސް ކުރައްވަނީ އޮންނަ އުސޫލުތަކާއި ގާނޫނުތަކާ އެއްގޮތަށެވެ.
