މާފަރު އިންޓަނޭޝަނަލް އެއާޕޯޓުގެ އޭޕްރަންއަށް އިތުރުކުރި ސަރަޙައްދު ހުޅުވާ، އެއާޕޯޓުގެ ޓާމިނަލްގެ ޖާގަ އިތުރު ކުރުމަށްޓަކައި ދެ ފަންގިފިލައިގެ އިމާރާތެއް ތަރައްގީކުރުމުގެ މަޝްރޫއުގެ ބިންގާ އަޅައިފި އެވެ.
މާފަރު އެއާޕޯޓު ތަރައްގީކުރުމުގެ މަޝްރޫއު ފަންޑު ކުރީ، އަބޫ ދާބީ ފަންޑް ފޯ ޑިވަލޮޕްމެންޓް (އޭޑީއެފްޑީ) މެދުވެރިކޮށެވެ. އެއާޕޯޓު ތަރައްގީ ކުރަން ފުރަތަމަ ހަވާލުކުރީ 2018 ވަނަ އަހަރު ސިންގަޕޫރުގެ ކުންފުންޏެއް ކަމަށްވާ ޓަފް އޮފްޝޯ އިންޖިނިއަރިން ސާވިސަސް ޕްރައިވެޓް ލިމިޓެޑާ އެވެ. އެއީ ޖުމްލަ އަގަކީ 49 މިލިއަން ޑޮލަރުގެ މަޝްރޫއެކެވެ. އަދި ދެވަނަ ފިޔަވަހި 2022 ވަނަ އަހަރު ހަވާލުކުރީ އެމްޓީސީސީއާ އެވެ. އެމްޓީސީސީއާ އެ މަޝްރޫއު ހަވާލުކުރީ 27 މިލިއަން ޑޮލަރަށެވެ.
މިއީ މާފަރު އެއާޕޯޓުގެ ހިދުމަތްތައް އިތުރަށް ފުޅާކޮށް، ދަތުރުފަތުރުގެ ގާބިލުކަން އިތުރުކުރުމަށް ކުރެވޭ މުހިންމު މަސައްކަތެކެވެ. އައިލެންޑް އޭވިއޭޝަނުން ބުނި ގޮތުގައި، މާފަރު އިންޓަނޭޝަނަލް އެއާޕޯޓުގެ ޓާމިނަލް 900 އަކަމީޓަރު ބޮޑުކުރުމަށް ވަނީ ނިންމާފަ އެވެ. ދެ ފަންގިފިލާއަށް ތަރައްގީކުރާ މި ޓާމިނަލްގައި ވީއައިޕީގެ އިތުރު ލައުންޖްތައް ހުންނާނެ އެވެ. މި މަސައްކަތް ކުރިއަށް ގެންދިއުމަށް ޗައިނާގެ ކުންފުންޏަކާ ހަވާލުކޮށްފައިވާއިރު، އެއްބަސްވުމުގައި ސޮއިކޮށްފައިވަނީ މިދިޔަ ނޮވެމްބަރު މަހު އެވެ.
މާފަރު އިންޓަނޭޝަނަލް އެއާޕޯޓުގެ އާ ޓާމިނަލްގެ މަސައްކަތް ކުރިއަށް އޮތް 10 މަސް ދުވަހުގެ ތެރޭގައި ނިންމުމަށް ވަނީ ކަނޑައަޅާފަ އެވެ. މި މަސައްކަތް ނިމުމުން އެއާޕޯޓުގެ ހިދުމަތްތަކުގެ ފެންވަރު އިތުރަށް މަތިވެ، ލޯކަލް އަދި ބައިނަލްއަގުވާމީ ދަތުރުފަތުރުގެ ދާއިރާއަށް އިތުރު ކުރިއެރުންތަކެއް ލިބިގެންދާނެ އެވެ.
