ހުޅުމާލޭ ދެވަނަ ފިޔަވަހީގައި ލަގްޒަރީ ހައުސިން ޕްރޮޖެކްޓެއް ހިންގާނެ ބަޔަކު ހޯދަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން އިއުލާނުކޮށްފި އެވެ.
އެޗްޑީސީން ބުނިގޮތުގައި، އެ ކަން ކުރުމަށް ޝައުގުވެރިވާ މީހުންނަށް އަންނަ ބުދަ ދުވަހުގެ 12:00އާ ހަމައަށް އެކްސްޕްރެޝަން އޮފް އިންޓްރެސްޓް (އީއައޯ) ހުށަހެޅޭނެ އެވެ. މި މަޝްރޫއު ހިންގަން 125،387 އަކަފޫޓުގެ ބިމެއް ދޫކުރުމަށް ހަމަޖެހިފައިވާ ކަމަށް އެޗްޑީސީން ބުންޏެވެ. އަދި އެ ތަނުގައި 47 މީޓަރު އުހަށް އިމާރާތް ކުރެވޭނެ ކަމަށް އެޗްޑީސީން މައުލޫމާތު ދިނެވެ.
އެޗްޑީސީން ބުނީ އެ ޕްރޮޖެކްޓު ހަވާލުކުރުމުގައި އެޗްޑީސީން އިސްކަން ދޭނީ ޑިވެލޮޕްމަންޓް އެންޑް ސޭލް ރައިޓްސް މޮޑެލްއަށް ކަމަށެވެ. އެކަމަކު އެހެނިހެން މޮޑެލްތަކަށް ވެސް އީއައިއޯ ހުށަހެޅޭނެ ކަމަށް އެޗްޑީސީއިން ބުންޏެވެ.
މި ޕްރޮޖެކްޓު ހިންގަން އެކަކަށް ވުރެ ގިނަ މީހުން އީއައޯ ހުށަހަޅައިފިނަމަ، މި ކަން ހަވާލުކުރާނީ ކުންފުނީގެ މާސްޓަޕްލޭނާއި ވިޝަން، އެންމެ ފުރިހަމައަށް ހިމެނޭ އީއައިއޯއަކަށް ކަމަށް އެޗްޑީސީން މައުލޫމާތުދިނެވެ. އީއައިއޯތައް އިވެލުއޭޓު ކުރުމުގައި ބިޒްނަސް މޮޑެލާއި މާލީ ގާބިލުކަމާއި ސީއެސްއާރު ފަދަ ކަންކަމަށް ބަލަން އެޗްޑީސީން ވަނީ ނިންމާފަ އެވެ.
