ހުޅުމާލެ ފޭސް 2ގައި ތިން ޕާކިން ބިލްޑިން އެޅުމުގެ މަސައްކަތް ތިން މަސް ތެރޭ ފަށާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ ފޭސް 2ގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ. ރައީސް ވިދާޅުވީ، އެ ތިން ޕާކިން ބިލްޑިންއެއް އެޅުމަށް މިހާރު އެގްރީމެންޓް ހަދާފައިވާ ކަމަށެެވެ. އަދި އެ މަސައްކަތް ކުރިއަށް އޮތް ތިން މަސް ތެރޭގައި ފަށާނެ ކަަމަށެވެ.
ރައީސް އިތުރަށް ވިދާޅުވީ، ފޭސް 2ގައި ހުންނަ ހިޔާ ޓަވަރުތަކުގައި ލިފްޓްތަކުގެ މަސައްކަތް ވެސް ތަވާލާ އެއްގޮތަށް އޭޕްރީލް މަހުގެ ނިޔަލަށް ނިމޭނެ ކަމަށެވެ. އަދި މިހާރު 6 ޓަވަރެއްގައި ލިފްޓް ހަރުކޮށް ހިދުމަތްދޭން ފަށާފައިވާ ކަމަށާއި ބާކީ ހުރިހާ ޓަވަރެއްގައި ލިފްޓް ހަރުކުރުމުގެ އަމަލީ މަސައްކަތް ކުރިޔަށް ދާ ކަމަށްވެސް ރައީސް ވިދާޅުވި އެވެ.
ފޭސް ދޭއްގެ ރައްޔިތުންނާއެކު ބޭއްވި ބައްދަލުކުރެއްވުމުގައި ރައްޔިތުން ހުށަހެޅި ކަންކަން ހައްލުކުރައްވާނެކަމަށް ވެސް އެމަނިކުފާނު ވިދާޅުވި އެވެ. އެގޮތުން ޕާކުތައް ތަރައްގީކުރުމާއި، މަގުތައް ހެދުމާއި ސެކިއުރިޓީ އިތުރަށް ރަނގަޅު ކުރުމުގެ މަސައްކަތް ފަށާފައިވާކަން ރައީސް ފާހަގަކުރެއްވި އެވެ.
