ހިޔާ ފްލެޓުތަކުގެ މެއިންޓަނަންސްއަށް ދައްކަންޖެހޭ 2 ލައްކަ ރުފިޔާގެ ފީ މާފުކުރުމަށް ވައުދުވެވަޑައިގެންނެވި ގޮތަށް އެބަދަލު ގެންނާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ހުޅުމާލޭ ދެވަނަ ފިޔަވަހީގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވަނީ، އެމަނިކުފާނުގެ ވެރިކަމުގެ ފުރަތަމަ ދުވަސްތަކުގެ ތެރޭގައި ވެވަޑައިގެންނެވި ވަޢުދުތައް ފުއްދަވައިދެއްވާނެކަން ތަކުރާރުކުރައްވާފަ އެވެ. އެގޮތުން، ރައީސް ވަނީ ހިޔާ ފްލެޓްތަކުގެ މިލްކުވެރިންނަށް 2 ލައްކަ ރުފިޔާގެ ޑިސްކައުންޓެއް ދިނުމަށް އެޗް.ޑީ.ސީއަށް ދަންނަވާފައިވާނެ ކަމަށާ، އެކަމަށްޓަކަައި އެގްރީމަންޓަށް ގެންނަ ބަދަލާއެކު، 2 ލައްކަ ރުފިޔާ އުނިކުރެއްވުމަށްޓަކައި ކުރައްވަންޖެހޭ ހުރިހާ ކަމެއް ކޮށްދެއްވާނެކަމުގެ ޔަގީންކަން ދެއްވާފަ އެވެ.
މީގެއިތުރުން، ފްލެޓު ކުލި ނުދެއްކި ބެކްލޮގް އަރާފައިވާ ފަރާތްތަކަށް ލުއި ގޮތްތަކެއް ހޯއްދަވައިދެއްވުމަށް ވެސް މަސައްކަތް ކުރައްވާކަމަށް ރައީސް ވިދާޅުވި އެވެ. އެގޮތުން، އެކަން ބެލުމަށް އަންގަވާފައިވާކަމަށާއި ލިބޭ މައުލޫމާތަށް ބެއްލެވުމަށްފަހު އެކަމަށް ހައްލެއް ގެނެސްދެއްވުމަށް މަސައްކަތް ކުރައްވާނެކަމުގެ ޔަގީންކަންވެސް އެމަނިކުފާނު ދެއްވި އެވެ.
ކުލީގެ މައްސަލައިގައި ރައްޔިތުން ފާހަގަކުރި ކަންކަން ސީރިއަސްގޮތެއްގައި ބައްލަވައި، ވައުދުވެވަޑައިގެންނެވިގޮތަށް ކުލީގެ އަދަދުތަކަށް ބަދަލު ގެންނަވާނެކަމުގެ ޔަގީންކަން ރައީސް ވަނީ ދެއްވާފަ އެވެ. މިއީ ހިޔާ ފްލެޓުތަކުގެ ދިރިއުޅޭ ރައްޔިތުންނަށް ދިމާވެފައިވާ މާލީ ދަތިތަކަށް ލުޔެއް ހޯދައިދިނުމަށް ސަރުކާރުން ކުރައްވާ މުހިންމު މަސައްކަތެކެވެ.
