އަމާން އުދަރެސް 6 ވަނަ ޓަވަރުގައި ޖެނެރަލް ޕްރެކްޓިސް (ޖީޕީ) ކްލިނިކެއް ގާއިމު ކުރުމުގެ އަމަލީ މަސައްކަތް ފަހި ދިރިއުޅުން ކޯޕަރޭޝަން (އެފްޑީސީ) އަދި މާލޭ ސިޓީ ގްރޫޕް އޮފް ހޮސްޕިޓަލްސް އިން ފަށައިފި އެވެ.

ޖީޕީ ކްލިނިކް ގާއިމުކުރުމަށްޓަކައި އެފްޑީސީ އާއި މާލޭ ސިޓީ ގްރޫޕް އޮފް ހޮސްޕިޓަލްސްއާއި ދެމެދު ކޮމާޝަން ޔުނިޓް ބޭނުން ކުރުމުގެ އެއްބަސްވުމެއްގައި ސޮއިކޮށްފައިވަނީ މި މަހުގެ 9 ވަނަ ދުވަހު އެވެ. މި އެއްބަސްވުމުގެ ދަށުން ހުޅުމާލޭގެ ދެވަނަ ފިޔަވަހީގައި އެފްޑީސީން ތަރައްގީ ކޮށްފައިވާ އަމާން އުދަރެސް 6 ވަނަ ޓަވަރުން 6،788.43 އަކަފޫޓުގެ ޖާގައިގެ ކޮމާޝަލް ޔުނިޓެއް ވަނީ މާލޭ ސިޓީ ގްރޫޕް އޮފް ހޮސްޕިޓަލަށް ދޫކޮށްފަ އެވެ.

މި އެއްބަސްވުމާއި ގުޅޭ ގޮތުން ވާހަކަ ދައްކަވަމުން އިބްރާހިމް އަބްދުއްރައްޒާގު ވިދާޅުވީ، މި ޕްރައިމަރީ އާބަން ހެލްތް ކެއާ ކްލިނިކުގައި އިތުރު ހިދުމަތްތަކެއް ދެވޭނެ ކަމަށެވެ. އެގޮތުން ވެކްސިން ދިނުމާއި ކުޑަކުދިން ގްރޯތު މޮނިޓަރިންގެ މަސައްކަތާއި ވެލްނެސް ކްލިނިކް، ކަައުންސެލިންގެ ހިދުމަތް އަދި ދުންފަތުގެ އިސްތިއުމާލު ކުރުން ހުއްޓާލުމަށް ބޭނުންވާ ފަރާތްތަކަށް ހާއްސަ ހިދުމަތްތައް ފޯރުކޮށްދިނުން ހިމެނޭ ކަމަށެވެ. މީގެއިތުރުން ތަޖުރިބާކާރު ޖެނެރަލް ޕްރެކްޓިޝަނަރުން މެދުވެރިކޮށް ވެސް ހިދުމަތްތައް ފޯރުކޮށްދޭނެ ކަމަށް ވިދާޅުވި އެވެ.

ހުޅުމާލެ ދެވަނަ ފިޔަވަހީގައި މިހާރު ވެސް ޖީޕީ ކްލިނިކެއް ހިންގަ އެވެ. ހިޔާ ޓަވަރު 16ގައި ހިންގާ އެ ކުލިނިކުން 24 ގަޑިއިރަށް ހިދުމަތް ދޭން ފެށީ، މިދިޔަ ސެޕްޓެމްބަރު މަހުގެ ތެރޭގަ އެވެ. އާންމު ސިއްހަތުގެ ނިޒާމު ވަރުގަދަކުރެއްވުމުގެ ގޮތުން އަދުގެ ސަރުކާރުން މާލެ ސަރަޙައްދުގައި ޤާއިމުކުރެއްވި ފުރަތަމަ އާބަން ޕްރައިމަރީ ހެލްތު ކެއާ ސެންޓަރު ހުޅުވާފައިވަނީ މިިދިޔަ މަހުގަ އެވެ. މާލެ ސަރަހައްދުގައި ތަރައްގީކުރާ ޖީޕީ ކްލިނިކްތަކުގެ އިތުރަށް އަތޮޅުތެރޭގައިވެސް އެފަދަ ސެންޓަރުތައް ތަރައްގީކުރުމަށް ވަނީ ހަމަޖެހިފަ އެވެ.