ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ މަސައްކަތުގެ މަސްއޫލިއްޔަތުތައް ފުރިހަމަ ކުރަމުންދާ ގޮތާ މެދު، ވޯޓުލާ އާބާދީގެ 60% ވުރެ ގިނަ މީހުން ހިތްހަމަޖެހޭކަމަށް "ބާނި ސެންޓަރ ފޯ އިންޓަރނޭޝަނަލް ޕޮލިސީ" އިން ހެދި ސާވޭއަކުން ދައްކައިފި އެވެ.

ރާއްޖޭގެ ތިންކް ޓޭންކެއް ކަމަށްވާ ބާނި ސެންޓަރުން މި މަހުގެ 23 އިން ޑިސެމްބަރު 1 ގެ ނިޔަލަށް ކުރިއަށް ގެންދިޔަ މި ދިރާސާގައި ނެގި ޕޯލުގައި ޖުމްލަ 9،921 މީހަކު ބައިވެރިވެފަ އެވެ. އޭގެ ތެރެއިން 62% މީހުން އެ މަނިކުފާނުގެ މަސައްކަތްޕުޅާ މެދު "ހިތްހަމަޖެހޭ" ނުވަތަ "ވަރަށް ބޮޑަށް ހިތްހަމަޖެހޭ" ކަމަށް ބުނެފައިވެ އެވެ.

އެ ނަތީޖާއާ އެކު، ރައީސްއަށް ލިބިފައި ވަނީ 24+ ނެޓް އެޕްރޫވަލް ރޭޓިންއެއް ކަމަށް ބާނީން ބުންޏެވެ. ރައީސްގެ މަސައްކަތްޕުޅާ މެދު ހިތްހަމަޖެހޭކަން ފާޅުކުރި 62% މީހުންގެ ތެރެއިން 21 ޕަސެންޓް މީހުން ވަނީ "ވަރަށް ބޮޑަށް" ހިތްހަމަޖެހޭ ކަމަށް ބުނެފަ އެވެ. ބާނީން ބުނި ގޮތުގައި، އެއީ އެމަނިކުފާނަށް ވަރަށް ބޮޑަށް ސަޕޯޓްކުރާ މީހުން ކަމަށް ބެލެވިދާނެ އެވެ. ބާކީ ތިބި 41 ޕަސެންޓް މީހުން "ހިތްހަމަޖެހޭ" ކަމަށް ބުންޏަސް، އެއީ އެމަނިކުފާނުގެ 'ދެގޮތެއް ނުވާ' ސަޕޯޓަރުން ކަމަކަށް ނުބެލެވެ އެވެ.

ސާވޭގެ ރިޕޯޓުގައި ވަނީ، ޖިންސު، އުމުރު އަދި އާބަނައިޒޭޝަންގެ ނަޒަރަކުން ވެސް ރައީސްގެ އެޕްރޫވަލް ރޭޓިން އަހައިފަ އެވެ. އެ ޕޯލްގެ ނަތީޖާތަކަށް ބަލާއިރު، ފިރިހެނުންނަށް ވުރެ އަންހެނުންގެ މެދުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް އޮންނަ ސަޕޯޓް އިތުރުކުރަން ވަނީ ފާހަގަކޮށްފައެވެ. އެގޮތުން އަންހެނުންގެ ނިސްބަތުން 64% މީހުން "ހިތްހަމަޖެހޭ" ނުވަތަ "ވަރަށް ބޮޑަށް ހިތްހަމަޖެހޭ" ކަމަށް ފާހަގަކޮށްފައިވެ އެވެ. ފިރިހެނުންގެ 60% މީހުން ރައީސަށް ތާއީދުކުރާ ކަމަށް ރިޕޯޓުގައި ބުނެފައިވެ އެވެ.

ވަކިވަކި އުމުރުފުރާތަކުގެ ނަތީޖާތަކަށް ބަލާއިރު، ދޮށީ އުމުރުގެ މީހުންގެ މެދުގައި ރައީސްއަށް އޮތް ތާއީދު އިތުރުކަމަށް ބަޔާންކޮށްފައިވެ އެވެ. މިގޮތުން، އުމުރުން 55 އަހަރަށް ވުރެ ދޮށީ އުމުރުގެ 67% މީހުން އެމަނިކުފާނުގެ މަސައްކަތާ މެދު ހިތްހަމަޖެހޭކަމަށް ވަނީ ބުނެފަ އެވެ. އުމުރު 18-24 އަހަރާ މެދުގެ ޒުވާނުންގެ ތެރެއިން ރައީސްގެ މަސައްކަތްޕުޅަށް 50% ތާއީދުކުރާ ކަމަށް ވެސް އެ ސާވޭގެ ނަތީޖާއިން ދައްކަ އެވެ.