ރާއްޖޭގައި ވިޔަފާރި ކުރާ ހުރިހާ ފަންތީގެ ވިޔަފާރިވެރިންނަށް ވެސް ހެޔޮ އަގުގައި ބިން ކުއްޔަށް ނެގޭ ގޮތަށް ހަދައިދޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ކުދި އަދި މެދުފަންތީގެ ވިޔަފާރިވެރީންނާއެކު ރޭ ބޭއްވި ބައްދަލުވުމުގައި ބައެއް ވިޔަފާރިވެރީން ވަނީ ގުދަން ކުރަން ބިން ހޯދުމަށް ދަތިތައް ދިމާވާތީ އެކަމުގައި ސަރުކާރުގެ އެހީތެރިކަމަށް އެދިފަ އެވެ. ރައީސް ވިދާޅުވީ ވިޔަފާރި މުދާ ގުދަން ކުރަން ކުއްޔަށް ތަންތަން ނުލިބޭ ކަމުގެ ޝަކުވާ ވިޔަފާރިވެރީންގެ ފަރާތުން އިވިވަޑައިގަންނަވާ ކަމަށާ އެއީ ސަރުކާރުން އެކަން ހައްލުކޮށްދެއްވަން މަސައްކަތް ކުރައްވާނެ ކަމެއް ކަމަށެވެ.
އެގޮތުން، އެޗްޑީސީން މިހާރުވެސް ބައެއް ތަންތަން ކުއްޔަށް ދިނުމަށް ތައްޔާރީތައް ވަމުންދާކަން ރައީސް ވަނީ ފާހަގަކުރައްވާފަ އެވެ. ރައީސް ވިދާޅުވީ ވެއާ ހައުސްތަކާއި ބިންތައް އެޗްޑީސީ އަދި އެމްޕީއެލް ކަހަލަ ތަންތަނުން ކުޑަ އަގެއްގައި ވިޔަފާރިވެރިންނަށް ލިބޭނެ ގޮތް ހަމަޖެއްސޭތޯ ކުނފުނިތަކާއި މަޝްވަރާ ކުރައްވައިގެން އެކަން ކުރެވޭނެ ގޮތް ހައްދަވައިދެއްވާނެ ކަމަށެވެ.
