ވައިގެ މަގުން ރާއްޖެއަށް ގެންނަ މުދާ ކްލިއާކުރުން ލަސްވުމުގެ ސަބަބުން ޑެމަރޭޖަށް ބޮޑު އަދަދެއް ދައްކަން ޖެހޭ ކަމުގެ ޝަކުވާ ބައެއް ވިޔަފާރިވެރިން ރޭ ކުރުމާ އެކު، ޑެމަރޭޖް ނުވެ މުދާ ބެހެއްޓޭ ވަގުތު 80 ގަޑިއިރުން 124 ގަޑިއިރަށް އިތުރު ކުރައްވާނެ ކަމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.
ކުދި އަދި މެދު ފަންތީގެ ވިޔަފާރިވެރީންނާއެކު ރައީސް ރޭ ބޭއްވި ބައްދަލްވުމުގައި ބައެއް ވިޔަފާރިވެރީން ވަނީ މުދާ ކުލިއާ ކުރަން ފްރީކޮށް ހަމަޖެހިފައި އޮންނަ ގަޑިއިރުތަކުގެ ތެރޭގައި އެކަން ނުކުރެވޭތީ ބޮޑު ގެއްލުމެއް ވަމުންދާކަން ފާހަގަ ކޮށްފަ އެވެ. އަދި ކްލިއަރެންސް މަަސައްކަތަށް އޮތް ހުރަސްތަކުގެ ވާހަކަ ވެސް ހިއްސާ ކުރެއްވި އެވެ.
މިހާރު އޮންނަ ގޮތުން މުދާ ކުލިއާ ކުރަން ފްރީކޮށް ލިބެނީ 80 ގަޑިއިރެވެ. ބައެއް ވިޔަފާރިވެރީން ބުނީ އޮންނަ ތަރުތީބުން މުދާ ނެރޭއިރު އެ ގަޑީގެ ތެރޭގައި މުދާ ނުނެރެވި ބޮޑު އެއްޗެއް ދައްކަން ޖެހޭ ކަމަށެވެ. ރައީސް ވަނީ އެ ކަންބޮޑުވުންތަކާއި ގުޅިގެން އެ ބައްދަލްވުމުގައި އިންނަވާ އެމްއޭސީއެލްގެ އިސްބޭފުޅުންނާއި މަޝްވަރާ ކުރައްވާފަ އެވެ. އަދި ވަނީ މުދާ ކުލިއާ ކުރަން ފްރީކޮށް ހަމަޖެހިފައި އޮންނަ ވަގުތު އިތުރުކުރައްވަން ނިންމަވާފަ އެވެ. މީގެ އިތުރުން ކްލިއަރެންސް މަަސައްކަތް ސައުވީސް ގަޑިއިރަށް ބަދަލު ކުރައްވާނެ ކަންވެސް އިއުލާނު ކުރައްވާފަ އެވެ.
ރައީސް ވަނީ ސަރުކާރުން ބޭނުންވަނީ ގޯސްކޮށް ހުރި ކަންކަން ހަރުދަނާކޮށް ރަނގަޅަށް ހިންގަމުންދާ ކަންކަން އިތުރަށް ރަނގަޅުކުރުމަށްކަމަށް ވިދާޅުވެފަ އެވެ. އަދި ޖުމްލަކޮށް ވިޔަފާރިވެރިންނަށް ދިމާވެފައިވާ ގޮންޖެހުންތަކަށް މަޝްވަރާކޮށް ހައްލު ހޯއްދާވާނެކަމުގެ ޔަގީންކަންވެސް އެމަނިކުފާނު ދެއްވި އެވެ.
