މާލެ ސިޓީ ކައުންސިލްގެ މޭޔަރަކަށް ވެރިކަން ކުރާ ކޮންގްރެސް ޕާޓީގެ މޭޔަރަކަށް ކުރީގެ ޑިފެންސް މިނިސްޓަރު މޫސާ އަލީ ޖަލީލް ވާދަކުރައްވާނެ ކަން ކަށަވަރުވެއްޖެ އެވެ.
ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް އިންތިހާބުކުރާ މެމްބަރުން ކަނޑައެޅުމަށްޓަކައި ބާއްވާ ކޮންގްރެސް ޕާޓީގެ ޕްރައިމަރީ މި މަހުގެ 28 ގައި އޮންނާނެކަން ވަނީ މިއަދު އިއުލާނުކޮށްފަ އެވެ، އެކަން އިއުލާނުކުރީ ޕްރައިމަރީގެ ތައްޔާރީތަކާ ގުޅޭގޮތުން ކޮންގްރެސް ޕާޓީން މިއަދު ބޭއްވި ނޫސްވެރިންގެ ބައްދަލުވުމުގަ އެވެ.
އެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މި އިންތިހާބުގެ ކެމްޕެއިން މެނޭޖަރު އަދި ޕީއެންސީގެ ޕާލިމަންޓްރީ ގްރޫޕްގެ ލީޑަރު އިބްރާހިމް ފަލާހު ވިދާޅުވީ މާލޭގެ މޭޔަރުކަމުގެ ޓިކެޓަށް ކުރިމަތިލެއްވީ އެންމެ ބޭފުޅެއް ކަމަށެވެ. އެކަމަކު އެއީ ކޮންބޭފުޅެއް ކަމެއް ވިދާޅެއް ނުވެ އެވެ.
" ދެން އަޅުގަނޑު ނުދެންނެވިޔަސް ތިބޭފުޅުންނަށް އެ ބޭފުޅާއަކީ އާ ނަމަކަށް ނުވާނެ ކަމަށް އަޅުގަނޑު ގަބޫލުކުރަނީ. ބައެއް ނޫސްތަކުގައި ވެސް އެބަހުރި ކަންނޭނގެ ލިޔުއްވާފައި ވެސް އެއީ ކޮން ބޭފުޅެއްކަން،" ފަލާހު ވިދާޅުވި އެވެ.
މީޑިއާތަކުގައި ރިޕޯޓުކޮށްފައިވާ ގޮތުގައި ކޮންގްރެސް ޕާޓީގެ ފަރާތުން މާލޭގެ މޭޔަރަކަށް ކުރިމަތިލެއްވުމަށް ހަމަޖެހިފައިވަނީ ރިޓަޔާޑް މޭޖާ ޖެނެރަލް މޫސާ އަލީ ޖަލީލެވެ.
