ސަރުކާރުގެ ބޯހިޔާވަހިކަމުގެ ސްކީމަކުން ކުރިން އެއް ކޮޓަރީގެ އެޕާޓްމަންޓް ލިބިފައިވާ ފަރާތަކަށްވެސް މީގެފަހުން ހައުސިން ސްކީމްތަކަށް ކުރިމަތިލެވޭގޮތަށް ހަމަޖައްސާފައިވާކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ގަލޮޅުގެ ރައްޔިތުންނާ ބައްދަލުކުރައްވާ ރައީސް ރޭ ވިދާޅުވީ ސަރުކާރުގެ ސްކީމަކުން އެއް ކޮޓަރީގެ އެޕާޓްމަންޓް ލިބިފައިވާ މީހުންނަށް އިތުރު ހައުސިން ސްކީމަކަށް ކުރިމަތިނުލެވުމަކީ ގިނަ ބައެއްގެ ކަންބޮޑުވުމެއް ކަމަށެވެ.
ރައްޔިތުންނާއެކު ބޭއްވުނު ބައްދަލުވުންތަކުގައި ހުށަހެޅި ހިޔާލު ބަލައިގަނެ ތަންކޮޅެއް ކުރީ ޒަމާނެއްގައި އެއް ކޮޓަރި ފްލެޓް ލިބިފައިވާ މީހުންނަށް މިހާރު ހުޅުވާލާ ހައުސިން ސްކީމްތަކަށް ފޯމު ހުށަހެޅޭ ގޮތަށް ހަމަޖައްސާފައިވާ ކަމަށް ރައީސް ވިދާޅުވި އެވެ. ހައުސިން ސްކީމަކަށް ކުރިމަތިލައި ހޮވިއްޖެނަމަ އެއް ކޮޓަރީގެ އެޕާޓްމަންޓް ދޫކޮށްލާ ގޮތަށް އުސޫލު އިސްލާހުކޮށްފައިވާ ކަމަށްވެސް ރައީސް ވިދާޅުވި އެވެ.
އާއިލާގެ މެމްބަރުން އިތުރުވުމާ ގުޅިގެން އެއް ކޮޓަރީގެ އެޕާޓްމަންޓުގައި ދިރިއުޅެން ދަތިވުމަކީ ގިނަ ބައެއްގެ ކަންބޮޑުވުމެކެވެ. އެހެންކަމުން، މިކަންބޮޑުވުމަށް ހައްލެއް ހޯއްދަވައިދެއްވުމުގެ ގޮތުން އެކަން ސަރުކާރުން މިހާރު ބަދަލުކުރައްވާފައިވާކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވީ، މި ބަދަލާއެކު، ކުރިން އެއް ކޮޓަރީގެ އެޕާޓްމަންޓް ލިބިފައިވާ ފަރާތްތަކަށްވެސް ދެން ހައުސިން ސްކީމްތަކަށް ކުރިމަތިލުމުގެ ފުރުސަތު ލިބިގެންދާނެ ކަމަށެވެ. އެގޮތުން ޝަރުތު ހަމަވެ، އިތުރު އެޕާޓްމަންޓެއް ލިބިއްޖެނަމަ، ކުރިން ލިބިފައިވާ އެއް ކޮޓަރީގެ އެޕާޓްމަންޓް ދޫކޮށްލާގޮތަށް ކަންކަން ކުރިއަށް ގެންދެވޭނެ އެވެ.
