ހުޅުމާލޭ ފޭސް 3 ގެ ބިން ހިއްކުމުގެ މަޝްރޫއުގެ 31.5 ހެކްޓަރު ހިއްކައިފި އެވެ.
އެ މަސައްކަތް ކުރަމުންދާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނީ މިހާތަނަށް 31.5 ހެކްޓަރުގެ ބިން ހިއްކާފައިވާ ކަމަށެވެ. އެއީ އެ ސަރަހައްދުން ހިއްކުމަށް ހަމަޖެހިފައިވާ 63 ހެކްޓަރުގެ ތެރެއިން 50% މަސައްކަތެވެ.
ބިން ހިއްކުމުގެ މަސައްކަތް އަވަސްކުރުމަށްޓަކައި މިހާރު ދަނީ ބޮޑު 2 ޑްރެޖަރު ބޭނުންކުރަމުން ނެވެ. 22000 ކިއުބިކް މީޓަރުގެ ވެލި އެއްފަހަރާ ނެގޭވަރުގެ ކެޕޭސިޓީގެ ޑްރެޖަރުތަކުގެ ތެރޭގައި ބޮސްކާލީސްގެ ޓްރެއިން ސަކްޝަން ހޮޕާ ޑްރެޖަރު ހިމެނެ އެވެ. އެމްއޭސީއެލުން ބުނީ އަމާޒަކީ ކުރިއަށް އޮތް ދޮޅު މަސްތެރޭގައި ބިން ހިއްކުމުގެ މަސައްކަތް އެއްކޮށް ނިންމާލުން ކަމަށެވެ.
ހުޅުމާލޭ ފޭސް 3 ހިއްކުމުގެ މަސައްކަތް ނިމުމާއެކު އެ ސަރަހައްދުން ގޯތި ލިބިފައިވާ ފަރާތްތަކަށް ގޯތި ދޫކުރާނެކަން ސަރުކާރުން ވަނީ ހާމަކޮށްފަ އެވެ.
