އެމްޕީއެލްއިން ކުރިއަށް ގެންދިޔަ ޔޫ އެން ޓްރޭޑް އެންޑް ޑިވެލޮޕްމަންޓްގެ މޮޑާން ޕޯޓް މެނޭޖްމަންޓް ޕްރޮގްރާމާއި އިތުރު ތަމްރީންތައް ފުރިހަމަ ކުރި ބައިވެރިންނަށް ސެޓްފިކެޓް ހަވާލުކޮށްފި އެވެ.
މިއީ، ޕޯޓުގެ ހިދުމަތްތައް ޒަމާނީ ކުރުމަށް މުވައްޒަފުންނަށް ބޭނުންވާ ތަމްރީނާއި ތަޖުރިބާ ދިނުމަށް ހިންގި ޕްރޮގްރާމްތަކެކެވެ. މީރުމާގައި ރޭ ބޭއްވި މި ރަސްމިއްޔާތު ޝަރަފުވެރިކޮށްދެއްވީ މިނިސްޓަރު އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މުހައްމަދު ސައީދެވެ.
މި ރަސްމިއްޔާތުގައި ޔޫ އެން ޓްރޭޑް އެންޑް ޑިވެލޮޕްމަންޓް (އަންކްޓަޑް) އާއި، އެމްޕީއެލް ގުޅިގެން ހިންގި އަންކްޓަޑް މޮޑާން ޕޯޓް މެނޭޖްމަންޓް ޕްރޮގްރާމް ފުރިހަމަ ކުރި ބައިވެރިންނާއި، ސެޓްފިކެޓް އިން ޕޯޓް އޮޕަރޭޝަންސް ކޯސް ފުރިހަމަކުރި ބައިވެރިންނަށް ވަނީ ސެޓްފިކެޓް ހަވާލުކޮށްފަ އެވެ. މީގެ އިތުރުން 2025 ވަނަ އަހަރު އެމްޕީއެލްއިން ހިންގި އިންޓާންޝިޕް ޕްރޮގްރާމް ފުރިހަމަ ކުރި ބައިވެރިންނަށްވެސް ވަނީ ސެޓްފިކެޓް ދީފަ އެވެ.
މީގެ އިތުރުން 12 އަހަރުގެ މެދުކެނޑުމަކަށް ފަހު 2024 ވަނަ އަހަރު ޔޫއެންސީޓީއޭޑީގެ މޮޑާން ޕޯޓް މެނޭޖްމަންޓް ޕްރޮގްރާމް އަލުން ފަށާފައިވާ ކަމަށް ވެސް މި އިވެންޓުގައި ފާހަގަކޮށްފައިވެ އެވެ. ޔޫއެންސީޓީއޭޑީ އާއި އެމްޕީއެލްގެ އޮފިޝަލުން ވަނީ ބެސްޓް އޯލް ރައުންޑް އެވޯޑާއި ސެޓްފިކެޓާއި އެވޯޑު ހަވާލުކޮށްފަ އެވެ.
އެމްޕީއެލްގެ ޕޯޓް ޓްރެއިނިންގ ސެންޓަރަކީ، އެމްޕީއެލްގެ މުވައްޒަފުންގެ ތައުލީމާއި ތަމްރީނުތައް ކުރިއަށް ގެންދިއުމަށް މަސައްކަތް ކުރާ ސެންޓަރެކެވެ. އެމްޕީއެލްގެ ޕޯޓް ޓްރެއިނިން ސެންޓަރުން ކޮންމެ އަހަރަކުވެސް، އެކުންފުނީގެ މުވައްޒަފުންނަށް ތައުލީމާއި ތަމްރީނުގެ ގިނަ ޕްރޮގްރާމްތަކެއް ހިންގަ އެވެ. އަދި ޕޯޓުގެ ދާއިރާއިން މީހުން ބިނާކުރުމަށްވެސް ގިނަ ޕްރޮގްރާމްތަކެއް ހިންގަ އެވެ.
