ސްކޭމްގެ މައްސަލަތަކުގައި، މި މަހުގެ ފުރަތަމަ ދެ ހަފްތާތެރޭ ފަސްލައްކަ ރުފިޔާއަށްވުރެ ގިނަ ފައިސާ ފޭރިގަނެފައިވާ ކަމަށް ފުލުހުން ހާމަކޮށްފި އެވެ.

މިކަމާ ގުޅޭގޮތުން ފުލުހުން އާންމުކުރި ތަފާސްހިސާބު ކަށް ބަލާއިރު، ޑިސެމްބަރު 1 އިން 14 އާ ހަމައަށް 45 ސްކޭމް މައްސަލައެއް ރިޕޯޓުކޮށްފައިވެ އެވެ. އަދި މި މައްސަލަތަކުގައި ޖުމުލަ 591،751.47 ރުފިޔާ ވަނީ ފޭރިގަނެފަ އެވެ.

ނަމަވެސް މި ފައިސާގެ ތެރެއިން 130،287.30 ރުފިޔާ އަނބުރާ ހޯދައިދެވިފައިވާނެ ކަމަށާއި، ރިޕޯޓް ކުރެވުނު މައްސަލަތަކުގެ ތެރެއިން އެންމެ ގިނައީ އީ-ކޮމާސް އާ ގުޅުންހުރި މައްސަލަތައް ކަމަށް ވެސް ފުލުހުން ބުންޏެވެ. އެގޮތުން އީ-ކޮމާސް އާ ގުޅުންހުރި 17 މައްސަލައެއް ހިމެނެ އެވެ.

އެހެން މީހެއްގެ ނަމުގައި އޮޅުވާލައިގެން ފައިސާ ހޯދުމުގެ 7 މައްސަލައަކާއި، އަދި ފިޝިންގ ލިންކް ބޭނުންކޮށްގެން 4 މައްސަލައެއް ވެސް ރިޕޯޓްކޮށްފައި ވާއިރު، ކަރަންސީ އެކްސްޗޭންޖުގެ 5 މައްސަލައެއް ވެސް ވަނީ ރިޕޯޓުކޮށްފައި ކަމަށް ފުލުހުން ބުންޏެވެ. އަދި މީގެ އިތުރުން އެހެނިހެން ބާވަތުގެ ސްކޭމްގެ 12 މައްސަލައެއް ވެސް ހިމެނެ އެވެ.

މިފަދަ ސްކޭމްތަކުގައި ބޭނުންކުރަނީ ނިކަމެތި ކުޑަކުދިންގެ ފޮޓޯތަކާއި، މީސްމީޑިއާގައި އެހީއަށް އެދިފައިވާ ފަރާތްތަކުގެ މައުލޫމާތުތައް ކަމަށް ވާއިރު، މިފަދަ ސްކޭމް ޕޯސްޓުތައް އަމާޒުކުރެވިފައިވަނީ އާންމުންގެ އަޅާލުމާއި ހަމްދަރުދީ ހޯދުމަށް ކަން ވެސް ފުލުހުން ފާހަގަކުރެ އެވެ.