އޮސްޓްރޭލިއާގެ ސިޑްނީގެ ބޮންޑައި ބީޗުގައި އިއްޔެ ދިން ބަޑީގެ ހަމަލާއަކީ ފިނޑި އަމަލެއްގެ ގޮތުގައި ދިވެހި ސަރުކާރުން މިއަދު ސިފަކޮށްފި އެވެ.
ޔަހޫދީ ފެސްޓިވަލެއް ކުރިއަށްދަނިކޮށް ބޮންޑައި ބީޗްގައި ދިން ޓެރަރިސްޓު ހަމަލާ ކުށްވެރިކޮށް ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ ނިކަމެތި މީހުންގެ ފުރާނަ މީހުންގެ ދުއްވާލި މިފަދަ ނުބައި އަމަލުތަކަށް އެއްވެސް މުޖުތަމައެއްގައި ޖާގައެއް ނެތް ކަމަށެވެ..
ރާއްޖެއިން ވަނީ އެ ހަމަލާގައި މަރުވި މީސްމީހުންގެ ޢާއިލާތަކަށް ތައުޒިޔާ ފޮނުވައި، އަދި އެ ހަމަލާގައި ޒަހަމްވި ފަރާތްތަކަށް އަވަސް ޝިފާއެއް ދެއްވުން އެދިފަ އެވެ.
"މި ހިތާމަވެރި ދަނޑިވަޅުގައި ދިވެހިރާއްޖޭގެ ސަރުކާރާއި ރައްޔިތުން ތިބީ އޮސްޓްރޭލިއާއާއެކު" ސަރުކާރުގެ ބަޔާނުގައިވެ އެވެ.
އޮސްޓްރޭލިއާ ގަޑިން އިއްޔެ އިރުއޮއްސި 6:47 ހާއިރު އެ ހަމަލާދީފައިވަނީ ޔަހޫދީންގެ ދީނީ ހަފުލާއެއް ފާހަގަކުރަމުން ދަނިކޮށެވެ. މި ހަމަލާދިނީ ބަޑިހިފައިގެން ތިބި ދެ މީހުންނެވެ. މި ހަމަލާގައި 15 މީހުން މަރުވެފައިވާއިރު 30 އަށް ވުރެ ގިނަ މީހުން ވަނީ ޒަހަމްވެފަ އެވެ.
