ރ. ދުވާފަރު މަގު ހެދުމުގެ މަޝްރޫއުގެ ތިންވަނަ ފިޔަވަހީގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފިއެވެ.

އެ މަޝްރޫއުގެ އެއްބަސްވުމުގައި ސޮއިކޮށްފައިވަނީ މަސްވެރިންގެ ދުވަހުގެ ހަރަކާތްތައް ބައްލަވާލެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ރަށަށް ކުރެއްވި ޒިޔާރާތުގެ ތެރެއިން ބޭއްވި ޖަލްސާއެއްގަ އެވެ.

އެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބެވެ. އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ސައުދީ އެވެ.

މި މަޝްރޫއުގެ ދަށުން ޖުމްލަ 16.65 ކިލޯމީޓަރު އެކުލެވޭ 75 މަގު ހަދާނެ އެވެ. އަދި ފެން ހިންދާ ނިޒާމެއް ގާއިމުކުރުމާއި ސާވިސް ލައިން އެޅުމާއި ގުދުރަތީ ގޮތުން ފެން ހިނދޭ ނިޒާމެއް ހަރުކޮށް ޕޭވްމަންޓެއް ހެދުމާއި ދުއްވާ ސަރަހައްދެއް ގާއިމުކޮށް މަގު ބައްތި ހަރުކުރާނެ އެވެ. މިއީ 312.66 މިލިއަން ރުފިޔާއަށް 810 ދުވަސްތެރޭ ނިންމަން އެމްޓީސީސީއާ ހަވާލުކޮށްފައިވާ މަޝްރޫއެކެވެ.

ދުވާފަރަކީ މިހާރުވެސް ޒަމާނީ ފެންވަރައް ގިނަ މަގުތަކެއް ހެދިފައިވާ ރަށެކެވެ. ތިންވަނަ ފިޔަވަހީގެ މަސައްކަތްތައް ނިމުމާއެކު ދުވާފަރު އިތުރަށް ތަރައްގީވެ ހިނގާ މީހުންނާއި ދުއްވާ އުޅަނދުތަކަށް އިތުރު ރައްކާތެރިކަމާއި ލުއިފަސޭހަތަކެއް ލިބޭނެ ކަމަށް އެމްޓީސީސީން ވަނީ ބުނެފަ އެވެ.