ދައުލަތުގެ މަސް ކުންފުނި، މިފްކޯއަށް ގަންނަ ކަޅުބިލަމަހުގެ އެންމެ ކުޑަ ސައިޒު އެއް ކިލޯއަށް ވުރެ ބަރުނަމަ، މާދަމާއިން ފެށިގެން އެންމެ މަތީ ރޭޓުގައި މަސް ގަތުމަށް ނިންމަވާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ހާމަކުރައްވައިފި އެވެ. މިފްކޯއިން މަސްވެރިންނަށް ވިއްކާ ތެލުގެ އަގު ވެސް ހެޔޮ ވާނެ ކަން ވެސް އެމަނިކުފާނު ވަނީ އިއުލާނުކުރައްވާފަ އެވެ.
ރައީސް މިކަންކަން އިއުލާނުކުރެއްވީ ރ. ދުވާފަރުގައި ރޭ ބޭއްވި މަސްވެރިންގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ނެވެ. އެގޮތުން އެމަނިކުފާނު ވިދާޅުވީ، 1.5 ކިލޯގެ ބަދަލުގައި އެއް ކިލޯއަށް ވުރެ ބަރު މަހަށް އެންމެ މަތީ ރޭޓުގައި ގަތުމަކީ މިފްކޯއާއި ފިޝަރީޒް މިނިސްޓްރީން ކުރި މަސައްކަތްތަކުގެ ނަތީޖާ ކަމަށެވެ.
މީގެއިތުރުން ސަރުކާރުން ދެން މަސް ގަންނާނެ އެންމެ ދަށް އަގަކީ ކިލޯއަކަށް 16 ރުފިޔާ ކަން ވެސް އެމަނިކުފާނު އިއުލާނުކުރެއްވި އެވެ. މިހާރު މަހަށް ދޭ އެންމެ ބޮޑު އަގަކީ ކިލޯއަކަށް 16 ރުފިޔާ އެވެ.
މާނައަކީ، މިފްކޯއަށް އެ ދުވަހަކު 17 ރުފިޔާއަށް ގަނެވެންޏާ، 18 ރުފިޔާއަށް ގަނެވެންޏާ، އަދި އެއަށްވުރެ މައްޗަށް ވެސް ގަނެވެންޏާ، މިފްކޯއިން ކަނޑައަޅާނެ އެ ވަގުތަކު ގަނެވޭނީ އެންމެ މަތީ އަގު. އެންމެ ދައްކޮށް 16 ރުފިޔާ،“ ރައީސް ވިދާޅުވި އެވެ.
ތެލުގެ އަގަށް ގެނައުމަށް ނިންމަވާފައިވާ ބަދަލަކީ ރައީސް ވިދާޅުވި ގޮތުގައި މަސްވެރިންނަށް ވިއްކާ ތެލުން އެވްރެޖްކޮށް 51 ލާރި ހެޔޮވުމެވެ. އަދި ތިން ޓަނަށް ވުރެ މަތިން އެ ކުންފުންޏަށް މަސްކިރާ ފަރާތްތަކަށް އެވްރެޖްކޮށް ތެލުން 71 ލާރި ހެޔޮވާނެ ކަމަށެވެ.
"މަސްކިރާ ހުރިހާ ފަރާތްތަކަކަށް 13 ރުފިޔާ 90 ލާރިއަށް ތެޔޮ ވިއްކާނެ، 3 ޓަނަށްވުރެ ގިނައިން ކިރާނަމަ 13 ރުފިޔާ 72 ލާރިއަށް ތެޔޮ ލިބޭނެ، ޢާންމު ފަރާތްތަކަށް 14 ރުފިޔާ 43 ލާރިއަށް ތެޔޮ ގަންނަން ލިބޭނެ،" ރައީސް ވިދާޅުވި އެވެ.
ރައީސް ވަނީ މަސްވެރިކަމުގެ ސިނާޢަތް ނަގާ ކޮޅަށްޖެހުމަށް ވޭތުވެ ދިޔަ ދެ އަހަރު ކުރެވިފައިވާ މަސައްކަތްތަކަކީ މިއަދު ތަފާސްހިސާބުތަކުން ފެންނާންހުރި ހަގީގަތެއް ކަމަށް ވިދާޅުވެފަ އެވެ. އަދި އެ ސިނާއަތް ކުރިއެރުވުމަކީ ފަރުދީ އަދި ޖަމައީ ތަރައްގީއަށް ކުރެވޭ ގައުމީ މަސައްކަތެއްގެ ގޮތުގައި ވެސް ސިފަކުރެއްވި އެވެ.
