މަސްވެރިންގެ ކަންކަން އިތުރަށް ފަސޭހަކުރުމުގެ ގޮތުން ގިނައިރު ކިއުގައި މަޑުނުކޮށް ބާނާ މަސްކޮޅު ކިރުވާލެވޭ ގޮތް މަގުފަހުކުރުމަށް "މަސްކިރާ އެޕް" ގެ ނަމުގައި އެޕްލިކޭޝަނެއް ރޭ ލޯންޗުކޮށްފި އެވެ.
މޯލްޑިވްސް ފިޝަރީޒް ކޮމްޕެނީ (މިފްކޯ)ގެ މި އެޕްލިކޭޝަން ލޯންޗުކޮށްފައިވަނީ، މަސްވެރިންގެ ދުވަހުގެ މުނާސަބަތުގައި ރ. ދުވާފަރުގައި ބޭއްވި ހާއްސަ ޖަލްސާއެއްގައި ހެލްތު މިނިސްޓަރު އަބްދުﷲ ނާޒިމެވެ.
މަސްކިރަން ދާއިރު، އެހެން ބައެއްގެ ބައިވެރިވުމެއް ނެތި އޮޓޯ ޖެނެރޭޓް ކުރެވޭ ކިއޫ ނަންބަރެއް ލިބޭގޮތަށް ފަރުމާކޮށްފައިވާ މި އެޕަކީ ފުޅާ ދާއިރާއެއްގައި މަސްވެރިންގެ ޚިޔާލާއި މަޝްވަރާވެސް ހޯދައިގެން ތައްޔާރުކޮށްފައިވާ އެޕެކެވެ.
މި އެޕްލިކޭޝަންގެ ސަބަބުން މަސްވެރިންނަށް ގިނަ ލިބިގެންދާނެ ފަސޭހަތަކުގެ ގޮތުގައި މިފްކޯއިން ފާހަގަކޮށްފައިވަނީ އެޕް މެދުވެރިކޮށް މަސްވެރި ދޯނިތައް ރަޖިސްޓްރީކުރުމުގެ ފުރުސަތު ލިބިގެން ދިއުމާއި ތެޔޮ، ފެން އަދި އައިސް ފަދަ ޚިދުމަތްތަކަށް އެދުމެވެ.
އަދި މަސް ކިރުމަށް ޓޯކަން އެއް ޖެނެރޭޓް ކޮށް، ކިއު ނަންބަރު ވަގުތުން ބަލާލުމުގެ ފުރުސަތުވެސް ލިބިގެންދާނެ ކަމަށް މިފްކޯއިން ބުންޏެވެ.
މިފްކޯއިން ބުނީ މީގެ ކުރިން އެ ދޯންޏަކުން މަސްކިރުވި އަދަދުތަކާއި ތަފާސްހިސާބުތައްވެސް އެޕުން ބަލާލެވޭނެ ކަމަށެވެ. އެއާއެކު، މަސްވެރިންނަށް އެމީހުންގެ މަސްވެރިކަމުގެ ތާރީހު ފަސޭހަ ކަމާއެކު އެނގިގެންދާނެ ކަމަށެވެ. މި އެޕާއެކު، ވަގުތު ސަލާމަތްވެ މަސްކިއުރުވުމަށް ކިއުގައި ޖެހިގެން ތިބެންޖެހޭ ވަގުތު ވަރަށް ބޮޑު ތަނުން ކުޑަވެގެންދާނެ ކަމަށް ސަރުކާރުން ގަބޫލުކުރެ އެވެ.
މީގެއިތުރުން ރައީސުލްޖުމްހުރިއްޔާ ޑރ. މުހައްމަދު މުއިއްޒު ވައުދުވެވަޑައިގެންފައިވާ ގޮތަށް އައިސް ޕްލާންޓްތަކުގައި އައިސް ލިބެން ހުރި މިންވަރު ބެލޭނެ އިންތިޒާމު "ކެޔޮޅު އެޕް" މެދުވެރިކޮށް މިހާރު ވަނީ ހަމަޖައްސާފަ އެވެ. މި ހިދުމަތް އިފްތިތާހުކޮށްދެއްވީ ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާނެވެ.
މި ފީޗާ އާއެކު، ރާއްޖޭގައި އައިސް ވިއްކާ ޕްލާންޓްތައް ހުންނަ ސަރަހައްދުތަކާއި ރަށްތަކުގެ މައުލޫމާތު ލިބިގެންދާނެ އެވެ. އަދި އެ އައިސްޕްލާންޓްތަކުގައި އައިސް ހުރި މިންވަރާއި، ދޯނިތަކަށް ލިބޭނެ މިންވަރު ވެސް ބަލާލެވޭނެ އެވެ.
