ރ. ދުވާފަރުގައި އާރްޓީއެލް ބަހުގެ ހިދުމަތް މިއަދު ފަށައިފިއެވެ.

މި ހިދުމަތް އެ ރަށުގައި ފަށާފައިވަނީ މަސްވެރިންގެ ދުވަސް ފާހަގަކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރ. ދުވާފަރަށް ވަޑައިގެންނެވުމުން ނެވެ. ބަހުގެ ހިދުމަތް ރަސްމީކޮށް ފައްޓަވައިދެއްވީ ރައީސް މުއިއްޒެވެ.

4000 މީހުންގެ އާބާދީއެއް ދިރިއުޅޭ ދުވާފަރުގައި އާރްޓީއެލް ބަހުގެ ޚިދުމަތް ފެށުމާއެކު އެރަށުގައި ދިރިއުޅޭ ރައްޔިތުންނަށް ދަތުރުފަތުރުކުރުމުގައި ފަސޭހަތަކެއް ލިބިގެންދާނެކަމަށް ސަރުކާރުން ގަބޫލުކުރެ އެވެ.

ސްކޫލް ހުޅުވިފައި ހުންނަ ދުވަސްތަކުހައި ބަހުގެ ހިދުމަތް ހެނދުނު 06:00 އިން މެންދުރު ފަހު 3:30 އަށް ފޯރުކޮށްދޭނެ އެވެ. ހޮނިހިރު ދުވަހާއި ސްކޫލް ބަނދު ދުވަސްތަކުގައި ބަހުގެ ހިދުމަތް މެނދުރު ފަހު 02:00 އިން ހަވީރު 05:00 އަށް ލިބޭނެ އެވެ.

އާރްޓީއެލްގެ ހިދުމަތް ސަރުކާރުން ފޯރުކޮށްދެނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކޮށްގެންނެވެ.

މީގެއިތުުރުން، އެ ރަށުގައި ވޮލީ ކޯޓެއް އެޅުމުގެ މަޝްރޫއު ގެ އަމަލީ މަސައްކަތް ވެސް ވަނީ މިއަދު ފަށާފަ އެވެ. އެއީ ވެސް އެމްޓީސީސީ އާ ހަވާލުކޮށްގެން ކުރިއަށްގެންދާ މަޝްރޫއު އެކެވެ.