ހައުސިން މިނިސްޓްރީ އިމާރާތުގައި ހިނގި އަލިފާނުގެ ބޮޑު ހާދިސާއާ ގުޅިގެން ދައުލަތަށް ލިބުނު ގެއްލުމުން އަރައިގަތުމަށް ޗައިނާއިން 2.8 މިލިއަން ޑޮލަރުގެ އެހީ ދީފި އެވެ.

މިނިސްޓްރީތަކުގެ މަސައްކަތްތަކަށް ބުރޫއެރުމާއި ގުޅިގެން، އެކަންކަމުން އަރައިގަނެ ސަރުކާރުގެ މަސައްކަތްތައް ފެށުމަށް ބޭނުންވާ 2.8 މިލިއަން ޑޮލަރުގެ މާލީ އެހީތެރިކަން ފޯރުކޮށްދިނުމުގެ ރަސްމިއްޔާތު އޮތީ މިއަދު ހެނދުނު މިނިސްޓްރީ އޮފް ފިނޭންސް އެންޑް ޕްލޭނިންގަ އެވެ.

ޗައިނާގެ މާލީ އެހީތެރިކަމާ ރާއްޖޭގެ ފަރާތުން ހަވާލުވެވަޑައިގަތީ ވަޒީރު މޫސާ ޒަމީރު އެވެ. ހޭންޑްއޯވަރ ސެޓްފިކެޓްގައި ސޮއިކުރައްވައި، ރަސްމީކޮށް ދިވެހި ސަރުކާރަށް އެހީގެ ތަކެތި ބަދަލުކުރުމުގެ އެއްބަސްވުން ޙަވާލުކޮށްދެއްވީ، ޗައިނާ ސަރުކާރުން ރާއްޖެއަށް ކަނޑައަޅާފައި ހުންނަވާ ސަފީރު ކޮންގް ޝިންހުއާ އެވެ.

އެ އަލިފާނުގައި ލިބުނު ބޮޑެތި ގެއްލުންތަކުން އަރައިގަންނަން ޗައިނާ ސަރުކާރުން މިއަދު ރާއްޖެ އަށް ހަދިޔާކުރި އެހީގެ ޕެކޭޖުގެ ތެރޭގައި ހިމެނެނީ ފިނޭންސް މިނިސްޓްރީން ބުނި ގޮތުގައި އޮފީސްތަކަށް ކޮންމެހެން ބޭނުންވާ ސާމާނާއި ފަރުނީޗަރު ފަދަ ތަކެއްޗެވެ.

އަމީނީ މަގުން ހާބަރު ކެފޭތައް ކައިރީގައި ހިންގަމުން އައި ހައުސިން މިނިސްޓްރީގެ އިމާރާތުގައި މިދިޔަ އަހަރުގެ ޑިސެމްބަރު 16 ވަނަ ދުވަހު ރޯވެ، އެ އިމާރާތުގައި އޭރު ހިންގި ކޮންސްޓްރަކްޝަން މިނިސްޓްރީ އާއި އެއާ ޖެހިގެން ހުރި ގްރީން ބިލްޑިންގްގައި ހިންގި އެންވަޔަރުމެންޓް މިނިސްޓްރީގެ އިމާރާތް ބޭނުން ނުކުރެވޭ ވަރަށް ވަނީ އަނދާފަ އެވެ. އެހެންވެ، އެ ތިން މިނިސްޓްރީގެ މަސައްކަތްތައް ދަރުބާރުގެ އަށް ބަދަލުކޮށް މަސައްކަތް ކުރަމުން އަންނަނީ އެ ތަނުގަ އެވެ.