ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތުތައް ފަހިކޮށްދިނުމަކީ ގައުމީ ތަރައްގީއަށާއި އާއިލީ ފުދުންތެރިކަމަށް އެތައް ފައިދާތަކެއް ހޯދައިދޭނެ ކަމެއް ކަމަށް ރައީސުްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ވިދާޅުވެއްޖެ އެވެ.
މެޑަމް މިފަދައިން ވިދާޅުވީ، ސްޓޭޓް އިލެކްޓްރިކް ކޮންޕެނީ (ސްޓެލްކޯ) އިން ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތުތައް ފަހިކޮށްދީ، ވަޒީފާ ހަމަޖެހުނުކަމުގެ ލިޔުން ހަވާލުކުރުމަށް ބޭއްވި ހާއްސަ ރަސްމިއްޔާތެއް ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ޝޯޝަލް އެންޑް ފެމިލީ ޑިވެލޮޕްމެންޓް މިނިސްޓަރު ޑރ. އާއިޝަތު ޝިހާމްގެ އިތުރުން، ސްޓެލްކޯގެ މެނޭޖިން ޑިރެކްޓަރު އަހްމަދު ޝަމާހް ރަޝީދު އަދި އެ ކުންފުނީގެ އިސްވެރިން ބައިވެރިވެވަޑައިގެންނެވި އެވެ.
ރަސްމިއްޔާތުގައި ވާހަކަފުޅު ދައްކަވަމުން ފަސްޓް ލޭޑީ ވަނީ، ނުކުޅެދުންތެރިކަން ހުންނަ ފަރާތްތަކަށް ވަޒީފާ ދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިޖުތިމާއީ މަދަދުވެރިކަމުގެ ޕްރޮގްރާމުގެ ދަށުން ފޯރުކޮށްދެވޭ މުހިންމު އެހީތެރިކަމެއްކަން ފާހަގަކުރައްވާފަ އެވެ. އަދި އެފަދަ ފަރާތްތަކަށް ވަޒީފާ ލިބުމުން ލިބޭ ބައެއް ފައިދާތައް އެކަމަނާ ހިއްސާކުރައްވައި ވިދާޅުވީ، މި ފައިދާތައް ލިބެނީ ހަމައެކަނި ވަޒީފާ ލިބޭ ފަރާތްތަށް އެކަނި ނޫން ކަމަށާއި، އޭގެ ފައިދާ މުޅި ގައުމަށާއި އާއިލާތަކަށް ވެސް ފޯރާނެކަމަށެވެ.
މީގެއިތުރުން، ވަޒީފާ ލިބުމުގެ ސަބަބުން އެފަދަ ފަރާތްތައް ނަފްސާނީ އަދި ޖިސްމާނީ ގޮތުން ދުޅަހެޔޮވާކަން އެކަމަނާ ފާހަގަކުރެއްވި އެވެ. އެކަމަނާ ވިދާޅުވީ، އައު ރައްޓެހިން ލިބި، މާލީ ގޮތުން ފުދުންތެރިވެ، ވަކި ގަޑިތަކެއްގައި ކަންކަން ނިންމަން ޖެހުމަކީ ނަފްސާނީ އަދި ޖިސްމާނީ ދުޅަހެޔޮކަން އިތުރުކުރުމަށް މަގުފަހިކޮށްދޭނެ ކަމެއް ކަމަށެވެ.
