ޕަބްލިކް ސާވިސް މީޑިއާ ޕީއެސްއެމްގެ މެނޭޖިން ޑިރެކްޓަރުގެ މަގާމަށް އަހްމަދު ޝަކީބު އައްޔަނު ކުރައްވައިފި އެވެ.
ޕީއެސްއެމްގެ އެމްޑީގެ މަގާމުގައި ހުރި އިބްރާހިމް ނަސްރީން އިސްތިއުފާ ދެއްވާފައިވާތީ އެ މަގާމަށް އަހުމަދު ޝަކީބު އައްޔަނުކުރައްވާފައިވާކަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން މިއަދު ވަނީ އިއުލާނު ކުރައްވާފަ އެވެ.
ޝަކީބަކީ، ތައުލީމީ ދާއިރާއާއި ޕްރެޒެންޓިންގެ ދާއިރާގައިވެސް ގިނަ ދުވަސްތަކެއް ވަންދެން ހިދުމަތް ކުރައްވާފައިވާ ބޭފުޅެކެވެ. ހާއްސަކޮށް ޕީއެސްއެމްގެ އެކި ޕްރޮގްރާމްތައް ޝަކީބު ވަނީ، ހުށަހަޅައި ދެއްވާފަ އެވެ. ތައުލީމީ ދާއިރާއާއި މީޑިއާ ދާއިރާ ހިމެނޭ ގޮތުން ޝަކީބު ވަނީ، 35 އަހަރަށްވުރެ ދިގު މުއްދަތަކަށް އެކި އެކި ދާއިރާތަކުގައި ހިދުމަތް ކުރައްވާފަ އެވެ.
މި ސަރުކާރުގައި ޕީއެސްއެމްގެ އެމްޑީގެ މަގާމުގައި ފުރަތަމަ ހުރީ ޒީނާ ޒާހިރެވެ. 9 މަހު އެ މަގާމު ފުރުއްވުމަށް ފަހު ޒީނާ އިސްތިއުފާ ދެއްވުމުން އެ މަގާމަށް އައްޔަނު ކުރެއްވީ މުހައްމަދު ސައީދު އެވެ. ނަމަވެސް ކުޑަދުވަސްކޮޅެއްގެ ފަހުން އޭނާ ވެސް އިސްތިއުފާ ދެއްވި އެވެ.
