މަސްވެރިންނަށް މި ސަރުކާރުން ވެފައިވާ ހުރިހާ ވައުދުތަކެއް ފުއްދާނެކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
މިއަދު ފާހަގަކުރާ މި އަހަރުގެ މަސްވެރިންގެ ދުވަހުގެ ހަރަކާތްތަކުގެ ތެރެއިން މިއަދު ރ. ދުވާފަރުގައި “މަސްވެރިންގެ ގުންޒަރު” ފެށުމުގެ ރަސްމިއްޔާތުގައި މިނިސްޓަރު ވިދާޅުވީ މަސްވެރިކަމުގެ ސިނާއަތުގައި ހުރި ގޮންޖެހުންތަކަކީ ޒަމާންވީ ގޮންޖެހުންތަކަކަށް ވާތީ އެކަމަށް ވަގުތުން ސަރުކާރުން ކުރަން ޖެހޭ ހޭދަ ވެސް ބޮޑު ކަމަށެވެ.
އެހެންނަމަވެސް ރައީސް ޑރ. މުހައްމަދު މުއިއްޒު މަސްވެރިންނަށް ވެވަޑައިގެންނެވި ހުރިހާ ވައުދުފުޅެއް ފުއްދަވާނެ ކަމަށް މިނިސްޓަރު ވިދާޅުވި އެވެ. އޭނަ ވިދާޅުވީ މަސްވެރިންގެ ގުންޒަރަކީ ވެސް ހުރިހާ މަސްވެރިން އެއްތަންވެ މަސްވެރި ސިނާއަތުގައި ހުރި ގޮންޖެހުންތައް ހައްލުކޮށް އެ ކަންކަމާ މެދު މަޝްވަރާ ކުރުމަށް ވަރަށް މުހިންމު ބައްދަލުވުމެއް ކަމަށެވެ.
ޝިޔާމު ވިދާޅުވީ ރާއްޖޭގައި މަސްވެރިކަމުގެ ސިނާއަތް އޮންނަނީ ސަރުކާރުން އެހީތެރިކަން ފޯރުކޮށް ދީގެން ކުރިއަށް ގެންދެވޭ ކަހަލަ ގޮތަކަށް ކަމަށެވެ. އަދި އެގޮތަށް ކުރިއަށް ގެންދިއުމުގައި ގޮންޖެހުންތަކެއް ސަރުކާރަށް ހުރި ކަމަށް ވިދާޅުވި އެވެ.
ޝިޔާމު ވިދާޅުވީ ހުރި ގޮންޖެހުންތަކާ އެކު ވެސް މަސްވެރިންގެ ހުރި ޒަމާންވީ ކަންބޮޑުވުންތަކަށް ހައްލު ހޯދުމަކީ ސަރުކާރުގެ ވަރަށް ބޮޑު އަމާޒެއް ކަމަށެވެ. އަދި މި ފަސް އަހަރު ތެރޭ ރައީސް މުއިއްޒުގެ ހުރިހާ ވައުދު ފުރިހަމަ ކުރައްވާނެކަމުގެ ޔަގީންކަން ދެއްވާ ކަމަށް ވިދާޅުވި އެވެ.
މި އަހަރުގެ މަސްވެރިންގެ ގުންޒަރުގައި ނުވަ އަތޮޅަކުން 40 މަސްވެރިންނާއި މަސް ޕްރޮސެސްކުރާ ހަތަރު ކުންފުންޔަކުން ބައިވެރިވެ އެވެ.
