ބޭންކް އޮފް މޯލްޑިވްސްގެ ކަސްޓަމަރުންގެ ކާޑުތަކަށް ދީފައިވާ ޑޮލަރު ލިމިޓްގެ ބޭނުން ބައެއް ފަރާތްތަކުން ނަހަމަ ގޮތުގައި ހިފަމުންގެންދާކަން ފާަހަގަކުރެވޭކަމަށް އެ ބޭންކުން ބުނެފި އެވެ.

ބީއެމްއެލުންވަނީ މިދިޔަ މަހުގެ 11 ވަނަ ދުވަހުން ފެށިގެން ދިވެހި ރުފިޔާ އެކުންޓަށް ދޫކޮށްފައިވާ ޑެބިޓް ކާޑު ރާއްޖެއިން ބޭރުގައި ބޭނުންކުރެވޭ ލިމިޓް އިތުރުކޮށްފަ އެވެ. މި ބަދަލުގެ ސަބަބުން ރާއްޖެއިން ބޭރުގައި ކާޑު މެޝިން މެދުވެރިކޮށް ބޭނުން ކުރެވޭ މުއާމަލާތްތަކަށް މަހަކަށް 1000 ޑޮލަރު، އަދި ޓިކެޓާއި ހޮޓެލް ބުކިންއަށާއި ސިއްހީ ފަރުވާއަށް ފައިސާ ދެއްކުމަށް މަހަކަށް 3000 ޑޮލަރާ ހަމަޔަށް ބޭނުން ކުރެވެ އެވެ.

ބީއެމްއެލުން ބުނީ ލިމިޓްތައް އިތުރުކޮށްދިނުމާއެކު ބައެއް ފަރާތްތަކުން ކާޑުގެ ބޭނުން ނަހަމަގޮތުގައި ބޭނުންކުރަމުންގެންދާކަން ފާހަގަކުރެވިފައިވާކަމަށެވެ. އެގޮތުން، ކަސްޓަމަރުންގެ ކާޑު އެހެން ކަސްޓަމަރުން ރާއްޖެއިން ބޭރަށް ގެންގޮސްގެން ބޭނުންކުރަމުންދާކަމަށް ފާހަގަކުރެވިފައިވާކަން ފާހަގަކުރަމުން ބީއެމްއެލްއިން ބުނީ އޭގެ ތެރެއިން އެކަކު 100 އަށްވުރެ ގިނަ ކާޑު ރާއްޖެއިން ބޭރަށް ގެންގޮސްގެން ބޭރުފައިސާ ހޯދުމަށް ވަކި މާޗަންޓެއްގެ ކާޑު މެޝިނުގައި އެ ކާޑުތައް ބޭނުންކޮށްފައިވާކަމަށެވެ.

މީގެ އިތުރުން ރާއްޖެއިން ބޭރަށް ދަތުރުނުކުރާ ފަރާތްތަކުގެ ކާޑުތައް ބޭނުންކޮށްގެން ގިނަ އަދަދަކަށް ޓިކެޓް އަދި ހޮޓާ ބުކިންއަށް ކަނޑައަޅާފައިވާ ލިމިޓް ބޭނުންކުރަމުންދާކަމަށްވެސް ބީއެމްއެލުން ފާހަގަކުރެ އެވެ.

ބީއެމްއެލުން ބުނީ، މިގޮތަށް ތިންވަނަ ފާރަތަކަށް ކާޑު ދިނުމާއި ނަހަމަ ގޮތުގައި ކާޑު ބޭނުންކުރުމަކީ ކާޑުގެ ވެރިފަރާތާއި ބޭންކާ ދެމެދު ވެފައިވާ އެއްބަސްވުމާ މުޅިން ޚިލާފު ކަމެއް ކަމަށެވެ. މީގެ އިތުރުން އަމިއްލަ ކާޑުން ބޭރުގެ މުއާމަލާތްތަކަށް ކަނޑައަޅާފައިވާ ލިމިޓަކީ، އެ ކާޑުގެ ވެރިފަރާތެއްގެ ހަމައެކަނި އަމިއްލަ ބޭނުންތަކަށް ކުރަންޖެހޭ ހަރަދުތައް ކުރުމަށް ދީފައިވާ ލިމިޓެއް ކަމަށް ބުނެފައި ވެއެވެ. އަދި އެފަދަ މުއާމަލާތްތަކަކީ އާންމުކޮށް ފައިސާގެ މުޢާމަލާތް ހިންގުމުގެ އުސޫލުތަކާ ހިލާފު މުއާމަލާތްތަކެއްކަމަށް ވެސް ބޭންކުން ބުންޏެވެ.

ކުރިޔަށް އޮތްތަނުގައި މިފަދަ މުއާމަލާތްތައް ބަލައި، ފިޔަވަޅު އެޅުމަށް ޓަކައި ކަމާބޭހޭ ފަރާތްތަކަށް ހުށަހަޅަމުންގެންދާނެ ކަމަށް ބީއެމްއެލްއިން ބުނެފައި ވެއެވެ.