ވިލިމާލޭގައި މާލޭ ސިޓީ ކައުންސިލުން ހިންގާ ޕްރޮޖެކްޓަކަށް، މާލޭ މޭޔަރު އާދަމް އާޒިމްގެ ކޮއްކޮއަކަށް އެ ރަށުން ބިމެއް ދީ، ޕްރޮޖެކްޓް ހަވާލުކުރި ކަމަށް ބުނާ މައްސަލައެއް ސިޓީ ކައުންސިލަށް ހުށަހަޅައިފި އެވެ.
މި މައްސަލަ ހުށަހަޅައިފައި ވަނީ، ވިލިމާލެ ކައުންސިލަރު ނަހުލާ އަލީ އެވެ. ނަހުލާ ބުނި ގޮތުގައި، ވިލިމާލޭގައި 'ވިމެންސް މާކެޓް އެންޑް އައުޓްޑޯ ފުޑް ކިއޮކްސް’ގެ ޕްރޮޖެކްޓަކަށް މޭޔަރުގެ ކޮއްކޮގެ ކުންފުންޏަކާ އެކު އެގުރިމަންޓް ހަދާފައިވަނީ ޕްރޮޖެކްޓް ބިޑްކޮށްގެން ކާމިޔާބުކުރި ފަރާތާ އެކު ވެސް އެގުރިމަންޓެއް ހަދާފައިވަނިކޮށެވެ.
އެގޮތުން، ބިޑް ކާމިޔާބުކުރި ފަރާތަކީ ބިޒްނަސް ޕްރައިވެޓް ލިމިޓެޑް އެކަމަކު، ބިޑްގައި ބައިވެރިނުވި ނަމަވެސް އެގްރިމެންޓެއް ހަދާފައިވާ ފަރާތަކީ ވިނޯވާ މޯލްޑިވްސް ޕްރައިވެޓް ލިމިޓެޑް އެވެ. އެއީ އާޒިމްގެ ކޮއްކޮ މުހައްމަދު ވިޝާމްގެ ކުންފުންޏެކެވެ.
މިއީ މިދިޔަ މަހު ސިޓީ ކައުންސިލުން އާންމުކޮށްފައިވާ މާލެ ސަރަހައްދުން ކުއްޔަށް ދޫކޮށްފައިވާ ބިންތަކުގެ ލިސްޓުގައި މިއިން މައުލޫމާތެއް ހިމަނާފައިނުވާކަން ވެސް ނަހުލާ ފާހަގަކުރެއްވި އެވެ.
މޭޔަރ އާޒިމާ މެދު ހުރި މިފަދަ ކަންބޮޑުވުންތަކެއް ދާދި ފަހުން ނަހުލާ ވަނީ ކައުންސިލް ބައްދަލުވުމެއްގައި ވެސް ފާޅުކުރައްވާފަ އެވެ. އެގޮތުން ވިލިމާލެ އިރުމަތީ ފަރާތު ބީޗުން 6000 އަކަފޫޓުގެ ބިމެއް ހިލޭ ދީފައިވާ ކަމަށް ތުހުމަތުކުރާއިރު، ވިލިމާލޭ ސިނާއީ ސަރަހައްދުން ބަގީ ބެހެއްޓުމަށް އާޒިމްގެ އާއިލީ ކުންފުންޏަކަށް ދޫކޮށްފައިވާ 1117 އަކަފޫޓުގެ ބިމަކަށް ކުލި ނުދައްކާ އޮންނަ ކަމަށް ތުހުމަތުކުރި އެވެ.
