ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ފުރަތަމަ ސެގްމެންޓްގެ 97% މަސައްކަތް ނިމިއްޖެ އެވެ.
މި މަޝްރޫއުއާ ގުޅިގެން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނީ މިހާރު މި މަޝްރޫއުގެ ދަށުން ކުރިއަށްދަނީ ތާރުއެޅުމުގެ މަސައްކަތް ކަމަށެވެ. އެ މަސައްކަތް ވެސް މިއަދު ނިންމަވާލެވޭނެ ކަމަށް އެ ކުންފުނިން ބުންޏެވެ. އަދި މަގުގެ ރޮނގުތައް ފާހަގަ ކުރުމާއި ބޯޑު ހަރުކުރުމުގެ މަސައްކަތް މި ހަފްތާގައި ނިންމާލެވޭނެ ކަމަށެވެ.
144 މިލިއަން ރުފިޔާއަށް ހިންގާ މި މަޝްރޫއުގެ ދަށުން 830 މީޓަރުގެ ސަރަހައްދެއް ތަރައްގީކުރެވޭއިރު، މަގު 4 ލޭނަށް ފުޅާކޮށް ހިނގާ މީހުންނަށް ވަކި ލޭނެއް ގާއިމުކުރުމާއި، ފެން ހިންދާ ނިޒާމެއް ގާއިމުކުރާނެ އެވެ.
މިއީ 1 އަހަރާއި 3 މަސް ދުވަހުން ނިންމާގޮތަށް އެމްޓީސީސީއާ ހަވާލުކޮށްފައިވާ މަޝްރޫއުއެކެވެ.
