މަސްތުވާތަކެތީގެ ވިޔަފާރިކުރާ މީހުންނަށް ރަހުމެއް، ހަމްދަރުދީއެއް އިސްތިސްނާއެއް ނޯންނާނެ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެ އެވެ.
އިހުސާން މިފަދައިން ވިދާޅުވީ އައްޑޫ ސިޓީގައި ފުޅާދާއިރާއެއްގައި މަސްތުވާތަކެތީގެ ވިޔަފާރިކުރާ ނެޓްވޯކެއްގެ ބޮޑުންތަކެއް އިއްޔެ ހައްޔަރުކުރުމާ ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގަ އެވެ.
މަސްތުވާތަކެއްޗާއި ދެކޮޅަށް ފުލުހުން ހިންގަމުންދާ 'އޮޕަރޭޝަން އަލިމަގު' ގެ ތެރެއިން ހައްޔަރުކުރި އެ ހަތަރު މީހުންނަކީ 2017 ވަނަ އަހަރުން ފެށިގެން މަސްތުވާތަކެތީގެ ވިޔަފާރިކުރާ ބައެއް ކަމަށާއި އެކައުންޓުތަކުގައި 14 މިލިއަން ދައުރުކުރި ކަމަށް ފުލުހުން ވަނީ ބުނެފަ އެވެ.
އިހުސާން ވިދާޅުވީ އޮޕަރޭޝަން އަލިމަގުގެ ތެރެއިން މަސްތުވާތަކެތީގެ ވިޔަފާރިކުރާ ފަރާތްތަކަށް ވަކިން ޓާގެޓްކުރެވިގެންދާނެ ކަމަށެވެ. އަދި ރާއްޖޭގައި އެ ވިޔަފާރިކުރާ މީހުންނަށް އެކަން ހުއްޓާލުމަށް އިންޒާރުދީ ނަސޭހަތްތެރިވެވަޑައިގެންނެވި އެވެ.
" ފުލުހުންގެ ތަހުގީގު އެމީހަކާހިސާބަށް ފޯރުމުން އެކަކަށްވެސް އިތުރު ރަހުމެއް ހަމްދަރުދީ އެއް އިސްތިސްނާއެއް ނޯންނާނެ! ހަމައެކަނި އޮންނާނީ ހަރުކަށި ގާނޫނީ ފިޔަވަޅު" އިހުސާން ވިދާޅުވި އެވެ.
އެ ހަތަރު މީހުންގެ ވަނަވަރު މިހާތަނަށް ހާމަކޮށްފައެއް ނުވެ އެވެ.
500 ފުލުހުންނާއެކު މުޅި ރާއްޖޭގައި ފުލުހުން ހިންގަމުންދާ މި އޮޕަރޭޝަން ފެށީ މިދިޔަ ނޮވެމްބަރު 13 ގަ އެވެ. އެ ދުވަހު މުޅި ރާއްޖޭގެ 100 އަށް ވުރެ ގިނަ ތަންތަން އެއްވަގުތެއްގައި ބަލައި ފާސްކޮށްފައިވެ އެވެ.
