މަސްތުވާތަކެއްޗާއި ދެކޮޅަށް ފުލުހުން ހިންގަމުންދާ 'އޮޕަރޭޝަން އަލިމަގު' ގެ ތެރެއިން އައްޑޫ ސިޓީގައި އެންމެ ފުޅާދާއިރާއެއްގައި މަސްތުވާތަކެތީގެ ވިޔަފާރި ކުރާ ނެޓްވޯކެއްގެ އިސް ބަޔަކު ހައްޔަރުކޮށްފި އެވެ.

މީޑިއާތަކަށް މައުލޫމާތު ދެމުން ފުލުހުން ބުނީ، އެމީހުން ހައްޔަރުކުރީ އިއްޔެ ކަމަށެވެ. އެ މީހުންގެ މައްޗަށް މަސްތުވާތަކެތި ޓްރެފިކް ކުރުމާއި މަނީ ލޯންޑާ ކުރުމުގެ ތަހުގީގު ފެށީ މިދިޔަ މާޗު މަހު އެވެ.

ފުލުހުން ބުނިގޮތުގައި އެމީހުންނަކީ 2017 އިން ފެށިގެން މަސްތުވާތަކެތީގެ ވިޔަފާރި ކުރަމުންދާ ބައެކެވެ.  އަދި ފާއިތުވި 5 އަހަރު މި ނެޓްވޯކުގެ އިސް 4 މީހެއްގެ އެކައުންޓްގައި 19 މިލިއަނަށްވުރެ ގިނަ ދިވެހި ފައިސާ ދައުރުކޮށްފައިވާ ކަމަށެވެ.

އެ މީހުންގެ ވަނަވަރެއް ފުލުހުން ހާމަކޮށްފައެއް ނުވެ އެވެ.

500 ފުލުހުންނާއެކު މުޅި ރާއްޖޭގައި ފުލުހުން ހިންގަމުންދާ މި އޮޕަރޭޝަން ފެށީ މިދިޔަ ނޮވެމްބަރު 13 ގަ އެވެ. އެ ދުވަހު މުޅި ރާއްޖޭގެ 100 އަށް ވުރެ ގިނަ ތަންތަން އެއްވަގުތެއްގައި ބަލައި ފާސްކޮށްފައިވެ އެވެ.