ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ރާއްޖެއިން ޖަޕާނަށް ކަނޑައަޅާފައި ހުންނަވާ ސަފީރު ކަމަށް، އަހުމަދު މަހުލޫފް މިއަދު އައްޔަންކުރައްވައިފި އެވެ.

މަހުލޫފް ސަފީރުކަމަށް އައްޔަންކުރެއްވީ، މިކަމަށްޓަކައި މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގަ އެވެ. އެގޮތުން، ރައްޔިތުންގެ މަޖިލީހުގެ ޖަލްސާގައި މި މަގާމަށް މަހްލޫފަށް ރުހުން ދެއްވީ 60 މެންބަރުންގެ އިއްތިފާގުންނެވެ. އެއްވެސް މެންބަރަކު އެކަމާ ދެކޮޅަށް ވޯޓު ދެއްވައިފައެއް ނުވެ އެވެ.

ރައީސް، ޖަޕާނުގައި ހުންނަވާ ސަފީރުކަމުގެ މަގާމަށް މަހްލޫފްގެ ނަން ރައްޔިތުންގެ މަޖިލީހަށް ހުށަހެޅުއްވީ ނޮވެމްބަރު 26 ވަނަ ދުވަހު އެވެ. އެއަށްފަހު، ރައްޔިތުންގެ މަޖިލީހުގެ ހާރިޖީ ގުޅުންތަކާބެހޭ ކޮމިޓީން ވަނީ އެ ނަން ދިރާސާކުރައްވައި، ކޮމިޓީގެ ރިޕޯޓު ހުށަހަޅުއްވާފަ އެވެ. މަހްލޫފަށް ރުހުން ދިނުމަށް ނިންމީ އިއްޔެގެ ޖަލްސާގައި އެ ރިޕޯޓު ފާސްކުރުމަށްފަހު އެވެ.

ޖަޕާނުގެ ސަފީރުކަމުގެ މަގާމު ހުސްވީ، އެ މަގާމުގައި ހުންނެވި ހަސަން ސޯބިރު މި އަހަރުގެ ޖުލައި 28 ވަނަ ދުވަހު އަވަހާރަވުމާ ގުޅިގެންނެވެ. މަހްލޫފް، ވެރިކަންކުރާ ޕީއެންސީއާ ގުޅިވަޑައިގަތީ ނޮވެމްބަރު 14 ވަނަ ދުވަހުގެ ރޭ ބޭއްވެވި ޕީއެންސީގެ ބޮޑު ޖަލްސާގައެވެ.

މިދިޔަ އެމްޑީޕީ ސަރުކާރުގައި އޭނާ ވަނީ ޔޫތު މިނިސްޓަރުކަން ކުރައްވާފަ އެވެ. މަހްލޫފް އެމްޑީޕީން ވަކިވެވަޑައިގަތީ މި އަހަރުގެ ސެޕްޓެމްބަރު މަހު އެވެ. މިނިސްޓަރުކަމުގެ އިތުރުން، އޭނާ ވަނީ 17 ވަނަ ރައްޔިތުންގެ މަޖިލީހާއި 18 ވަނަ ރައްޔިތުންގެ މަޖިލީހުގެ މެންބަރުކަންވެސް ކުރައްވާފަ އެވެ.