މިއަދަކީ މަސްތުވާތަކެތީގެ ވަބާއިން ރާއްޖެ ސަލާމަތްކުރުމަށް މުޅި ދައުލަތުން އެއް ރޫހެއްގައި މަސައްކަތް ކުރަން ފެށި ދުވަސްކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ ރާއްޖެއަށް ޑްރަގް ޓްރެފިކްކުރާ މީހުންނަށް މަރުގެ އަދަބު ކަނޑައެޅުމަށް މިއަދު ފާސްކުރި މަސްތުވާތަކެތީގެ ގާނޫނާއި ޑްރަގް ގެ ބޮޑެއް ބަންދުން ދޫކޮށްލި ކަމަށް ތުހުމަތުކުރެވޭ ކްރިމިނަލް ކޯޓުގެ ފަނޑިޔާރު ހުސެއިން ފާއިޒް ވަކިކުރުމަށް ރައްުޔިތުންގެ މަޖިލީހުން ނިންމި ނިންމުމާ ގުޅިގެން ނެވެ.
ސޯޝަލް މީޑިއާގައި ކުރެއްވި ޕޯސްޓެއްގައި އިހުސާން ވިދާޅުވީ މިއަދަކީ ޑްރަގުގެގެ ވަބާއިން ރާއްޖެއަށް ސަލާމަތް ކުރުމަށް މިއަދު މުޅި ދައުލަތުން ތެދުވެ އެއް ރޫހެއްގައި މަސައްކަތް ފަށައިފިކަން ރައްޔިތުންނަށް އިހުލާސްތެރިވާނެ ދުވަހެއް ކަމަށެވެ.
އެގޮތުން ފުލުހުންނާއި ވަކީލުންނާއި ފަނޑިޔާރުންގެ ވެސް ހިމެނޭހެން އެންމެ ޖަވާބުދާރީވާންޖެހޭ އަދި ކުރުވާނެ ކަން މިއަދު އިހުސާސްވާ ކަމަށް އޭނާ ވިދާޅުވި އެވެ.
"މިކަމަށްޓަކައި ދައުލަތުގެ އެންމެ އިސްވެރިޔާ އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާއި ދިވެހި އެންމެހާ ރައްޔިތުން އަދި ދިވެހި ފުލުހުންގެ ނަމުގައި ޝުކުރު ދަންނަވަން" އިހުސާން ވިދާޅުވި އެވެ.
މަސްތުވާތަކެތީގެ ގާނޫނަށް މިއަދު ގެނައުމަށް ފާސްކުރި އިސްލާހަށް އިޝާރާތްކުރައްވަމުން އޭނާ ވިދާޅުވީ މަސްތުވާތަކެތި އެތެރެކުރާ މީހުންނަށް މަރުގެ އަދަބު ދިނުމަށް ނިންމުމަކީ މިވަގުތަށް އެންމެ މުހިއްމު ނިންމުމެއް ކަމަށެވެ.
