"މޯލްޑިވްސް ވިޒިޓާ ސާވޭ"ގެ ނަމުގައި، ރާއްޖެއިން ފުރައިގެންދާ ފަތުރުވެރިންނާ ގުޅޭ ތަފްސީލު މައުލޫމާތު އެއްކުރުމުގެ މަސައްކަތް ފަށައިފި އެވެ.

ޓޫރިޒަމް މިނިސްޓްރީގެ ބެލުމުގެ ދަށުން ވެލާނާ އިންޓަނޭޝަނަލް އެއާޕޯޓުގައި ކުރިއަށްގެންދާ މި ސާވޭ، މި މަހުގެ 15 ވަނަ ދުވަހުގެ ނިޔަލަށް ކުރިއަށްދާނެ އެވެ.

މި ސާވޭގެ ތެރެއިން، ފަތުރުވެރިންގެ ތަފާސްހިސާބުތައް (ޖިންސާއި، އުމުރު ފަދަ މައުލޫމާތު) އާއި، ރާއްޖޭގައި އެމީހުންނަށް ލިބުނު ތަޖުރިބާތަކާއި، ރާއްޖޭގެ ފަތުރުވެރިކަމުގެ އުފެއްދުންތަކާއި ހިދުމަތްތަކާ މެދު ފަތުރުވެރިންގެ ހިޔާލުތަކާ ގުޅޭ މައުލޫމާތުތައް އެއްކުރެވޭނެ އެވެ. ޓޫރިޒަމް މިނިސްޓްރީން ހާމަކުރި ގޮތުގައި، މިފަދަ މައުލޫމާތުތަކަކީ މި  ސިނާއަތް ކުރިއެރުވުމަށްޓަކައި، ދެނެގަނެވޭ ހަގީގަތްތަކަށް ބިނާކޮށް ނިންމުންތައް ނިންމުމަށް އެހީތެރިވެދޭނެ ކަމެކެވެ.

މީގެ އިތުރުން، ބައިނަލްއަގްވާމީ މާކެޓްތަކުގައި ރާއްޖެއަކީ އެންމެ ކުރީގައި އޮންނަ ފަތުރުވެރިކަމުގެ މަންޒިލެއްގެ ގޮތުގައި ދެމެހެއްޓުމަށްޓަކައި ވާދަވެރިކަން ވަރުގަދަ ކުރުމުގައިވެސް ސާވޭގެ ނަތީޖާތަކުން މުހިންމު ދައުރެއް އަދާކުރާނެ ކަމަށް މިނިސްޓްރީން ބުންޏެވެ.

ރާއްޖެއަށް މިހާރު އެވްރެޖްކޮށް ދުވާލެއްގެ މައްޗަށް 6،000 އަށް ވުރެ ގިނަ ފަތުރުވެރިން ޒިޔާރަތްކުރެ އެވެ. އަހަރުގެ މިހާތަނަށް ދެ މިލިއަނަށް ވުރެ ގިނަ ފަތުރުވެރިން ރާއްޖެއަށް އައިސްފައިވެ އެވެ.