ރާއްޖެއަށް މަސްތުވާތަކެތި އެތެރެކޮށް ވިޔަފާރިކުރާ މީހުންނަށް މަރުގެ އަދަބު ދިނުމަށް ހުށަހަޅާފައިވާ ބިލު ރައްޔިތުންގެ މަޖިލީހުން މިއަދު ފާސްކޮށްފި އެވެ. .
މަސްތުވާތަކެއްޗާ ބެހޭ ގާނޫނަށް ސަރުކާރުގެ ފަރާތުން ގަމު ދާއިރާގެ މެންބަރު ޔޫސުފް ނަޝީދު ހުށަހެޅުއްވި މި ބިލުގައި ވަނީ ސުޕްރީމް ކޯޓުގެ ފަނޑިޔާރުންގެ ބެންޗުގެ އިއްތިފާގުން ހުކުމް ކޮށްފިނަމަ، މަސްތުވާތަކެތި އެތެރެކޮށް ވިޔަފާރި ކުރާ މީހުންނަށް މަރުގެ އަދަބު ކަނޑައެޅޭނެ ކަމަށެވެ.
ގާނޫނު ކުރިން އޮންނަ ގޮތުން މަސްތުވާތަކެތީގެ ކުށްތަކަށް އޮންނަ އެންމެ ބޮޑު އަދަބަކަށް 25 އަހަރުގެ ޖަލު ހުކުމަކާއެކު އެއް ލައްކައާއި 10 މިލިއަން ރުފިޔާއާ ދެމެދުގެ އަދަދަކަށް ޖޫރިމަނާ ކުރުމެވެ.
އެކަމަކު މި ގާނޫނަށް ގެންނަން ފާސްކުރި އިސްލާހާއެކު، ތިން ހާލަތެއްގެ ދަށުން މަރުގެ އަދަބު ކަނޑައެޅެ އެވެ. އެގޮތުން، 350 ގްރާމަށްވުރެ އިތުރު އަދަދެއްގެ ކެނަބިސް، 250 ގްރާމަށްވުރެ އިތުރު އަދަދެއްގެ ޑައިމޯފިން ގެ އިތުރުން ކެނެބިސް ނުވަތަ ޑައިމޯފިން ފިޔަވައި ޖަދުވަލު 1 ގައިވާ މަސްތުވާތަކެތީގެ ބާވަތެއްނަމަ 100 ގްރާމަށްވުރެ އިތުރު އަދަދަކަށް މަސްތުވާތަކެތި ފެނުނަސް މަރުގެ އަދަބު ދެވިދާނެ ކަމަށް އެ އިސްލާހުގައިވެ އެވެ.
ބިލުގައި ވާގޮތުން މަރުގެ އަދަބު ކަނޑައެޅޭ މައްސަލަތަކުގައި އެ މީހަކު ރާއްޖެ އެތެރެކުރި މަސްތުވާތަކެއްޗަކީ އެ މީހަކު ރާއްޖެއަށް އެތެރެވިއިރު އެތެރެ ކުރި އެއްޗަކަށްވާން ޖެހެ އެވެ.
މަރުގެ އަދަބު ތަންފީޒުކުރެވޭނީ ދަށު ކޯޓުގެ މަރުހަލާ ނިމި، ސުޕްރީމް ކޯޓުން އެ މައްސަލަ ބަލާ ފަނޑިޔާރުންގެ އިއްތިފާގުން މަރުގެ އަދަބު ދޭން ހުކުމް ކުރުމުން ނެވެ. އެންމެ ފަނޑިޔާރަކު ވެސް މަރުގެ އަދަބު ދޭން ދެކޮޅު ހަދައިފިނަމަ، އެ މީހަކަށް ލިބޭނީ ގާނޫނުގައި ވެސް މިހާރު އޮންނަ އަދަބެވެ. އެއީ އުމުރަށް ޖަލަށްލުމާ އެކު، 1 ލައްކަ ރުފިޔާ އާއި 10 މިލިއަން ރުފިޔާއާ ދެމެދު އަދަދަކުން ޖޫރިމަނާ ކުރުމެވެ.
