ސްރީލަންކާއަށް ސައިކްލޯން ޑިޓުވާގެ ސަބަބުން ކުރިމަތިވެފައިވާ ގެއްލުންތަކުން އަރައިގަތުމަށް އެހީތެރިވުމުގެ ގޮތުން ދައުލަތުގެ މީޑިޔާއިން ކުރިއަށްގެންދިޔަ "ސިލޯނާއެކު ދިވެހީން" ޓެލެތޯން ނިންމާލައިފި އެވެ. މި ޓެލެތޯން ނިންމާލިއިރު 240 މިލިއަނަށް ލަންކާ ރުޕީސް އަށް ވުރެ ބޮޑު އަދަދެއް ލިބިފައިވެ އެވެ.

މި ޓެލެތޯން ނިމުނުއިރު، ބޭންކް އޮފް މޯލްޑިވްސްއިން ހުޅުވައިލި ރުފިޔާ އެކައުންޓަށާއި ޑޮލަރު އެކައުންޓަށް ގިނަ އަދަދެއްގެ ފައިސާ ޖަމާވެފައިވެ އެވެ. އެގޮތުން، ރުފިޔާ އެކައުންޓަށް 11,015,856.65 ރުފިޔާ، އަދި ޑޮލަރު އެކައުންޓަށް 43,681.31 ޑޮލަރު ޖަމާކުރެވިފައިވެ އެވެ.

މި ފައިސާއަކީ ލަންކާ ރުޕީސްއަށް ބަދަލުކުރުމުން 240 މިލިއަން ލަންކާ ރުޕީސްއަށްވުރެ ގިނަ އަދަދެކެވެ. މި އެހީއަކީ ލަންކާއަށް އައި ޑިޓްވާ ތޫފާނުގައި ގެއްލުން ލިބުނު ފަރާތްތަކަށް އެހީތެރިވުމަށް ބޭނުންކުރެވޭނެ ފައިސާ އެވެ.

މިހާރު ކުރިއަށްދަނީ ފަންޑު ފޮށިތަކަށް މީހުން ޖަމާކުރި ފައިސާ ގުނުމުގެ މަސައްކަތެވެ. މި ޓެލެތޯނަށް އެންމެ ގިނައިން ފައިސާ ހަރަދުކުރީ ދިވެހި ފުލުހުންގެ ހިދުމަތާއި، ދިވެހި ސިފައިންގެ ފަރާތުންނެވެ. ފުލުހުންގެ ހިދުމަތުންވަނީ 2،455،111.26 ޓެލެތޯނަށް ހަދިޔާކޮށްފަ އެވެ. ސިފައިން ވަނީ 1،000،000 ރުފިޔާ ހަދިޔާކޮށްފަ އެވެ.

ޓެލެތޯނު ނިމުމަކަށް އައިސްފައިވާއިރު، ދައުލަތުގެ އިދާރާތަކާއި ކުންފުނިތަކާއި އަމިއްލަ ވިޔަފާރިތަކުން ޓެލެތޯނުގައި ބައިވެރިވެ ގިނަ އަދަދެއްގެ ފައިސާ ލަންކާއަށް އެހީތެރިވުމަށް ހަދިޔާކޮށްފައިވެ އެވެ. މިއީ ކުޑަ ވަގުތުކޮޅެއްގެ ތެރޭގައި މިހާތަނަށް އިންތިޒާމުކޮށްގެން ކުރިއަށްގެންދިޔަ އެންމެ ކާމިޔާބު ޓެލެތޯނެވެ.