ތޫފާން ދީތުވާގެ ސަބަބުން ބޮޑެތި ގެއްލުންތަކާ ކުރިމަތިވެފައިވާ ސްރީ ލަންކާއަށް އެހީވުމަށް ބޭއްވި "ސިލޯނާއެކު ދިވެހީން" ޓެލެތޯންގައި، މޯލްޑިވްސް ޕޯޓްސް ލިމިޓަޑް (އެމްޕީއެލް) އިން 350،000 ރުފިޔާ ހަދިޔާކޮށްފި އެވެ.

އެމްޕީއެލްއިން ބުނިގޮތުގައި، މި ފައިސާއަކީ ލަންކާއަށް ދިމާވެފައިވާ ގިނަގުނަ ދަތިތަކުން އަރައިގަތުމަށް އެހީތެރިކަމުގެ އަތެއް ދިނުމުގެ ގޮތުން އެމްޕީއެލްއިން ދިން މުހިންމު އެހީއެކެވެ. މި ހަދިޔާކުރެވުނު 350،000 ރުފިޔާއަކީ އެމްޕީއެލް ކުންފުނީގެ ފަރާތުން ހަދިޔާކުރި ފައިސާ އާއި، އެ ކުންފުނީގެ ހުރިހާ މުވައްޒަފުންގެ ފަރާތުން ހަދިޔާކުރި ފައިސާ އެއްކޮށްލައިގެން ހޯދާފައިވާ އަދަދެކެވެ.

ލަންކާއަށް އެހީވުމަށް ބޭއްވި މި ޓެލެތޯންގައި ފައިސާ އެއްކުރުމަށްޓަކައި އެމް.ޕީ.އެލްގެ ތިން ސަރަހައްދެއްގައި ފަންޑް ފޮށި ބަހައްޓާފައިވެ އެވެ. އެއީ އެމްޕީއެލްގެ ހެޑް އޮފީސް، މާލޭ ނޯތު ހާބަރު ސަރަހައްދު އަދި މާލޭ ސައުތު ވެސްޓް ހާބަރު (ޓީ-ޖެޓީ) ސަރަހައްދުގަ އެވެ. މިގޮތުން، އެމްޕީއެލްގެ މުވައްޒަފުންނާއި އާންމުންނަށް ވެސް މި ހަރަކާތުގައި ބައިވެރިވުމުގެ ފުރުސަތު ލިބިގެންދިޔަ އެވެ.

ތޫފާން ދީތުވާގެ ސަބަބުން ސްރީ ލަންކާއަށް ވަނީ މީގެ ކުރިން ނުދެކޭފަދަ ބޮޑެތި ގެއްލުންތަކެއް ލިބިފަ އެވެ. ގިނަ ބަޔަކު ވަޒަންވެރިވެފައިވާ ތަންތަން ގެއްލި، ބިންގަނޑު ކަނޑައިގެން ދިއުމާއި، ވަރަށް ގިނަ އުމްރާނީ ތަރައްގީގެ މަސައްކަތްތަކަށް ގެއްލުން ލިބިފަވެ އެވެ.