ކުރިއަށް އޮތް ލޯކަލް ކައުންސިލް އިންތިހާބުގައި ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ވާދަ ކުރާނެ ކެންޑިޑޭޓުން ކަނޑައެޅުމަށް އެތެރޭގެ އިންތިހާބު އަންނަ މަހުގެ 27 ގައި ބޭއްވުމަށް ނިންމާފައިވާކަން ހާމަކޮށްފި އެވެ.

ސަރުކާރު ހިންގާ ޕާޓީ، ޕީޕަލްސް ނެޝަނަލް ކޮންގްރެސްގެ ޕާލިމެންޓަރީ ގުރޫޕުގެ ލީޑަރު އަދި އިންތިހާބުގެ ކެމްޕެއިން މެނޭޖަރު އިބްރާހިމް ފަލާހު ވިދާޅުވީ، ލޯކަލް ކައުންސިލް އަދި ޑަބްލިއުޑީސީ އިންތިހާބާއި ގުޅިގެން ޕީއެންސީން ބާއްވާ ޕްރައިމަރީގައި ވަރަށް ގިނަ އަދަދެއްގެ ކެންޑިޑޭޓުން ވާދަކުރާނެ ކަމަށް ލަފާކުރެވޭ ކަމަށެވެ. ފަލާހު ވިދާޅުވީ، އަންނަ މަހުގެ 1 ވަނަ ދުވަހުން ފެށިގެން އެތެރޭގެ އިންތިހާބުގައި ބައިވެރިވުމުގެ ފުރުސަތު ހުޅުވާލަން ހަމަޖެހިފައިވާ ކަމަށާއި އިންތިހާބާއި ގުޅޭ މައުލޫމާތު ޕީއެންސީގެ ވެބްސައިޓުން ލިބޭނެ ކަމަށެވެ.

އަންނަ މަހުގެ 15 ވަނަ ދުވަހާއި ހަމައަށް ކުރިމަތިލުމުގެ ފުރުސަތު މިހާރު ހުޅުވާލާފައިވާއިރު ކުރިމަތިލެވޭނީ ޕާޓީގެ ވެބްސައިޓުގައި އޮންނަ އޮންލައިން ފޯމެއް މެދުވެރިކޮށް ކަމަށް ފަލާހު ވިދާޅުވި އެވެ. އަދި މިކަމަށް އެދި ކުރިމަތިލެވޭނީ، މިވަގުތު ޕާޓީގެ މެންބަރެއްގެ ގޮތުގައި ދަފުތަރުވެފައިވާ ފަރާތްތަކަށް ކަމަށްވެސް ވިދާޅުވި އެވެ.

މި އިންތިހާބު ވެގެންދާނީ ރާއްޖޭގައި މިހާތަނަށް ބޭއްވޭ އެންމެ ބޮޑު ޕްރައިމަރީއަށް ވެގެން ދާނެކަމަށް ގަބޫލު ކުރެވޭކަމަށް ކެމްޕޭން މެނޭޖަރު ފަލާހު ވިދާޅުވި އެވެ. ވަރަށް ގިނަ އަދަދެއްގެ ފަރާތްތަކުން މިހާރުވެސް ޝައުގުވެރިކަން ހާމަކުރަމުންދާކަމަސް ފަލާހު ވިދާޅުވި އެވެ.

ފަލާހު ވިދާޅުވީ މި އިންތިހާބުގައި ވޯޓު ލެވޭނީ އެމީހަކު ރަޖިސްޓްރީވެފައިވާ ރަށެއްގައި ބަހައްޓާފައިވާ ވޯޓު ފޮށިތަކަށް އެކަނި ކަމަށެވެ. އެގޮތުން ރަށްރަށަށް ނިސްބަތްވާ ވޯޓު ފޮށި އެހެން ރަށެއްގައި ނުވަތަ މާލޭގައި ނުބަހައްޓާނެކަމަށް ފަލާހު ވިދާޅުވި އެވެ.