މަސްތުވާތަކެތީގެ ވިޔަފާރިއާ ދެކޮޅަަށް ނޮވެންބަރު އެއްވަނަ ދުވަހުން ފެށިގެން ފުލުހުން ކުރިއަށްގެންދާ އޮޕަރޭޝަން އަލިމަގުގެ ތެރެއިންް 29 ކިލޯގެ މަސްތުވާތަކެތި އަތުލައިގަނެފައިވާ ކަަމަށް ފުލުހުން ބުނެފި އެވެ/
"އޮޕަރޭޝަން އަލިމަގު" އާ ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ، ރާއްޖޭގެ 5 ސަރަހައްދެއްގެ 39 ރަށެއްގައި ކުރިއަށްގެންދިޔަ މި އޮޕަރޭޝަނުގައި 500 ފުލުހުން ބައިވެރިވި ކަމަށެވެ. އަދި 105 ތަނެއް ބަލައި ފާސްކުރުމަށްފަހު 110 މީހަކު ފުލުހުންގެ ބެލުމުގެ ދަށަށް ގެންދިޔަ ކަމަށްވެސް ބުންޏެވެ. މީގެ އިތުރުން 1 ކަނޑު އުޅަނދާއި 9 އެއްގަމު އުޅަނދުވެސް ފުލުހުން ވަނީ ބަލައި ފާސްކޮށްފަ އެވެ.
މި އޮޕަރޭޝަނުގެ ތެރެއިން މި މަހުގެ 1 އިން ފެށިގެން 14 އާ ހަމައަށް 29 ކިލޯ މަސްތުވާތަކެތި ފުލުހުންގެ ބެލުމުގެ ދަށަށް ގެނެސްފައިވެ އެވެ. ފުލުހުން ބުނި ގޮތުގައި މި އޮޕަރޭޝަނުގައި ހައްޔަރުކުރި މީހުންގެ ތެރެއިން 61 މީހުންގެ ކުޑަކަމުދާ ތަކެތި މަސްތުވާތަކެއްޗަށް ޕޮޒިޓިވްވި އެވެ. އަދި ޖުމްލަ 38 ފަރާތެއް ކޯޓަށް ހާޒިރުކޮށް، ފުލުހުންވަނީ ކޯޓުން ބަންދުގައި ބޭތިއްބުމަށް އަމުރުކުރި ފަރާތްތަކުގެ ވަނަވަރުވެސް އާއްމުކޮށްފަ އެވެ.
މީގެއިތުރުން، ފުލުހުން މައުލޫމާތު ދެއްވާ ގޮތުގައި މި އޮޕަރޭޝަނުގައި ރެއިޑް ކުރި ތަންތަނުން މަސްތުވާތަކެތީގެ އިތުރުން ފައިސާވެސް ވަނީ ފެނިފައެވެ. އެގޮތުން 188،959.84 ރުފިޔާ އެތަންތަނުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށްވެސް ބުންޏެވެ. މި އޮޕަރޭޝަނަކީ މަސްތުވާތަކެތި ބޭނުންކޮށް، އެތަކެތީގެ ވިޔަފާރި ކުރާ ފަރާތްތަކާ ދެކޮޅަށް ފުލުހުން ކުރިއަށްގެންދާ އޮޕަރޭޝަނެކެވެ. ކުރިއަށް އޮތް ދުވަސްތަކުގައިވެސް މި އޮޕަރޭޝަން ކުރިއަށްދާނެ އެވެ.
