އަލަށް އުފެދެމުންދާ ޓެކްނޮލޮޖީގެ ވަސީލަތްތަކުގެ ޒަރިއްޔާއިން އަންހެނުންނާއި އަންހެން ކުދީން ބާރުވެރިކުރުމަށް މަސައްކަތްކުރުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އިލްތިމާސްކުރައްވައިފި އެވެ.
އަންހެނުންނާ ދެކޮޅަށް ހިންގާ އަނިޔާވެރި އަމަލުތައް ނައްތާލުމުގެ ދުވަހާ ގުޅުވައި 'އެކްސް’ގައި ކުރެއްވި ޕޯސްޓެއްގައި ރައީސް ވިދާޅުވީ، މިއަދު ހުރިހާ އަންހެނުންނާއި އަންހެން ކުދިން ހުރިހާ ބާވަތެއްގެ އަނިޔާތަކުން ރައްކާތެރިކުރުމަށް ސަރުކާރުން ކަނޑައަޅާފައިވާ އަޒުމާ އެއްގޮތަށް ސަރުކާރުން މަސައްކަތް ކުރަމުންދާ ކަމަށެވެ.
ރައީސް ވިދާޅުވީ، ޓެކްނޮލޮޖީއާ ދިރިއުޅުން ދުވަހެއް ދުވަހަކަށް ގުޅިލާމެހިގެންދާ އިރު އަންހެނުންނާއި އަންހެން ކުދިންނަށް އޮންލައިންކޮށް ކުރާ ފުރައްސާރަތަކާއި ނާޖާއިޒު ފައިދާ ނެގުމުގެ ނުރައްކާތައް އިތުރުވަމުންދާ ކަމަށެވެ. އެހެންވެ ޓެކްނޮލޮޖީއަށް އަންނަ ބަދަލުތަކާ އެކު އަންހެނުންނާއި އަންހެން ކުދިން ބާރުވެރިކޮށް، ކުރިއަރުވައި ސަލާމަތްކަން ލިބިގެންވާ މާހައުލެއް ގާއިމުކޮށް ދޭން ޖެހޭ ކަމަށް ވިދާޅުވި އެވެ.
އިތުރަށް ރައީސް އެދިވަޑައިގެންނެވީ ޓެކްނޮލޮޖީގެ ތެރެއިން އަންހެނުންގެ ކުރިއެރުމަށާއި މުޅި ގައުމުގެ ކުރިއެރުމަށްވެސް އެކަށީގެންވާ ރައްކާތެރި ޖާގަތަކެއް އުފެއްދުމަށެވެ.
ކޮންމެ އަހަަރަކު ނޮވެންބަރު 25 ވަނަ ދުވަހު އަންހެނުންނާ ދެކޮޅަށް ހިންގާ އަނިޔާވެރި އަމަލުތައް ހުއްޓައިލުމަށް ގޮވައިލުމުގެ ގޮތުން ފާހަގަކުރާ އަންހެނުންނާ ދެކޮޅަށް ހިންގާ އަނިޔާވެރި އަމަލުތައް ނައްތައިލުމުގެ ދުވަސް ނިސްބަތް ވަނީ ޑޮމިނިކަލް ރިޕަބްލިކްގެ ކުރީގެ ލީޑަރު ރަފައެލް ޓްރޫޖިލޯގެ ހުދުމުހުތާރު ވެރިކަމާ ދެކޮޅަށް މަސައްކަތްކުރި މިރަބެލް ސިސްޓާސްއަށެވެ.
