300 ހައުސިން ޔުނިޓް ހާއްސަ ކުރާނީ ވިލިމާލޭ ރައްޔިތުންނަށް: ރައީސް

446387_8a399497-b_

300 ހައުސިން ޔުނިޓް ހާއްސަ ކުރާނީ ވިލިމާލޭ ރައްޔިތުންނަށް: ރައީސް

SHARE

ވިލިމާލޭގައި ގާއިމުކުރައްވާ 3 ކޮޓަރީގެ 300 ހައުސިން ޔުނިޓު ހާއްސަކުރާނީ ވިލިމާލޭގައި ދިރިއުޅޭ ރައްޔިތުންނަށްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވީ ވިލިމާލޭގައި ދިރިއުޅޭ ރައްޔިތުންނާއި ބައްދަލުކުރައްވާ ރޭ ދެއްކެވި ވާހަކަފުޅުގަ އެވެ. ރައީސް ވިދާޅުވީ، ބޭންކު އޮފް މޯލްޑިވްސް އިން ފައިނޭންސް ކޮށްގެން ހިންގާ 3000 ހައުސިން ޔުނިޓްގެ ތެރެއިން 300 ހައުސިން ޔުނިޓް އިމާރާތް ކުރައްވާނީ ވިލިމާލޭގައި ކަމަށެވެ. ރައީސް ވަނީ އެ ޔުނިޓްތައް ޚާއްސަ ކުރާނީ ވިލިމާލޭގައި ދިރިއުޅޭ ރައްޔިތުންނަށް ކަމަށް ވިދާޅުވެފަ އެވެ.

މީގެ އިތުރުން، ވިލިމާލޭގެ މަގުތައް ޒަމާނީ ފެންވަރަށް ހެދުމުގެ މަސައްކަތް ކުރިއަށްގެންދަވާނޭ ކަމަށާއި، އެ މަސައްކަތް ކުރިއަށްދާނީ، ފެނާއި، ކަރަންޓާއި، ނަރުދަމާގެ ނިޒާމު އަޕްގްރޭޑްކުރުމުގެ މަސައްކަތާ އެކީގައިކަމަށް އެމަނިކުފާނު ވިދާޅުވި އެވެ. އަދި މި ފެށޭ އަހަރު، ވިލިމާލޭގައި މަލްޓި ސްޕޯޓްސް ކޮމްޕްލެކްސްއެއް ގާއިމުކުރެއްވުމުގެ މަސައްކަތް ކުރައްވާނޭ ކަމަށާއި، ވިލިމާލޭގައި ޑޮލަރު އޭޓީއެމްއެއް ބަހައްޓަވާނޭކަމަށްވެސް އެމަނިކުފާނު ވިދާޅުވި އެވެ.

އެ ބައްދަލްވުމުގައި ވާހަކަ ދައްކަވަމުން ހައުސިން މިނިސްޓަރު މުއްތަލިބް ވިދާޅުވީ ވިލިމާލޭގައި ވީހާވެސް ގިނަ ހައުސިން ޔުނިޓް އެޅުމަކީ ސަރުކާރުގެ ވިސްނުން ކަމަށެވެ. އެހެން ކަމުން މާލެ ސަރަހައްދުގައި ޤާއިމުކުރައްވާ 3,000 ހައުސިން ޔުނިޓްގެ ތެރެއިން ވިލިމާލޭގައި މިވަގުތު އިމާރާތް ކުރެވެން އޮތް އެންމެ ގިނަ އަދަދަކީ އެއީ ކަމަށެވެ.