ދޮންބަންޑާރައިންގެ ހިކުމަތާއި، ހުޝިޔާރުކަމާއި، މި ވަތަންގެ މައްޗަށް އޮތް ކުލުނު ހާމަވި ތާރީހީ ހާދިސާއަށް 3 ގަރުނު ވާން ކައިރިވީ އިރުވެސް، އެ ހަނދާންތައް ޝުކުރުވެރިކަމާއެކު މި ފަސްގަނޑުގައި ދިރިދިރިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިފަދަން ވިދާޅުވީ، މިއަދު ފާހަގަކުރަމުންދާ ހުރަވީ ދުވަހުގެ ތަހުނިޔާ ދިވެހި ހުރިހާ ރައްޔިތުންނަށް ފޮނުއްވައި އެކްސްގައި ހިއްސާކުރެއްވި ޕޯސްޓެއްގައި އެވެ. ރައީސް ވިދާޅުވީ، މާލޭގެ އެތައް ތަނެއްގައި ހުޅުޖަހާ، އޭރުގެ ރަދުން ރަހީނުކޮށް ލާއިންސާނީ އެތައް އަނިޔާއެއް ދިވެހީންނަށް ދީ އަޅުވެތިކަމުގެ ނާމާން ދުވަސްތަކެއް ގައުމަށް ހޮޅިން ގެނައިކަމަށެވެ. އަދި، އެ ނުރައްކަލުން ރާއްޖެ ސަލާމަތްކުރެއްވުމަށް ދޮންބަންޑާރައިން ކުރެއްވި ގައުމީ ޖިހާދަށް މިއަހަރަށް 281 އަހަރުވެފައިވާކަން އެމަނިކުފާނު ފާަހަގަކުރެއްވި އެވެ.

މީގެއިތުރުން، ދޮންބަންޑާރައިންގެ ހިކްމަތާއި، ހުޝިޔާރުކަމާއި، ދިވެހި ވަތަނުގެ މައްޗަށް އޮތް ކުލުނު އެތާރީހީ ހާދިސާއިން ހާމަވާކަމަށްވެސް ރައީސް ވިދާޅުވި އެވެ. އަދި މި ތާރީހީ ހާދިސާއަށް 3 ގަރުނުވާން ކައިރިވީއިރުވެސް އެހަނދާންތައް މިފަސްގަނޑުގައި ޝުކުރުވެރިކަމާއެކު ދިރިދިރި ހުރިކަމަށް އެމަނިކުފާނު ވިދާޅުވި އެވެ. އެމަނިކުފާނުގެ ޕޯސްޓް ނިންމާލައްވާފައި ވަނީ މިއަދު ފާހަކުރަމުންދާ ފަހުރުވެރި ހުރަވީ ދުވަހުގެ ތަހުނިޔާ ދިވެހި ލޮބުވެތި ރައްޔިތުންނަށް އަރިސްކުރައްވަމުން ނެވެ.

ހޮޅީންގެ އަތްދަށުން ރާއްޖެ މިނިވަންވި ދުވަހުގެ ގޮތުގައި، ކޮންމެ އަހަރަކު ހުރަވީ ދުވަސް ފާހަގަކުރަނީ ޖުމާދަލްއާހިރާ މަހުގެ 3 ވަނަ ދުވަހެވެ.