އިސްލާމްދީނުގެ ހުދޫދުން ބޭރުނުވާ ގޮތަށް ކަންކަން ކުރުމަށް ފިލްމީ އިންޑަސްޓްރީގެ އަރިހުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެދިވަޑައިގެންފި އެވެ.
އެމަނިކުފާނު މިފަދައިން އެދިވަޑައިގަތީ ސޯޝަލް މީޑިއާގައި ކުރެއްވި ޕޯސްޓެއްގަ އެވެ. ރައީސްގެ ޕޯސްޓްގައި ވިދާޅުވީ، މިއީ ސައްތައިން ސައްތަ މުސްލިމު ގައުމެއްކަމުން އިސްލާމްދީނުގެ ގިއުގަނޑުގެ ތެރޭގައި އަމަލުތައް ބެހެއްޓުމަކީ ރާއްޖޭގެ ކޮންމެ ރައްޔިތަކު އުފަލާއެކު ކުރަންވާނެކަމެއް ކަމަށެވެ.
މީގެއިތުރުން، ހެދިބޮޑުވަމުން އަންނަ ޖީލަށް އިސްލާމީ ސަގާފަތާއެއްގޮތައް ހެޔޮ ނަމޫނާ ދައްކާ ބަޔަކަށް އަޅުގަނޑުމެން ވުމަކީ މި ގައުމަށްޓަކައި ކޮށްދެވޭނެ އެންމެ އަގުހުރި ހިދުމަތް ކަމަށްވެސް ރައީސް ވިދާޅުވި އެވެ.
ރައީސް މިފަދައިން އިލްތިމާސް ކުރެއްވީ ރޭ އޮލިމްޕަހުގައި ޕްރިމިއާކުރި ފިލްމެއްގެ ރެޑްކާޕެޓްގައި ފިރިހެނަކު އަންހެން ހެދުން އަޅައިގެން ހިނގި މައްސަލާގައި އާންމުންގެ ބޮޑު ފާޑުކިޔުމެއް އަމާޒުވެފައި ވަނިކޮށެވެ.
