ދުންފަތާ ދެކޮޅަށް ރާއްޖޭން އެޅި ފިޔަވަޅުތަކާއެކު، ބައިނަލްއަގްވާމީ ޖަމިއްޔާއެއްކަމަށްވާ ގްލޯބަލް ސެންޓާ ފޯ ގުޑް ގަވަނަންސް އިން ޓޮބޭކޯ ކޮންޓްރޯލް (ޖީޖީޓީސީ) އިން ދޭ އެވޯޑެއް ރާއްޖެއަށް ލިބިއްޖެ އެވެ.

ރާއްޖެއަށް މި އެވޯޑް ދިނުމުގައި އެ ޖަމިއްޔާއިން ރިއާޔަތްކުރި ކަންކަމުގެ ތެރޭގައި، އެ ޖަމިއްޔާއިން ކޮންމެ 2 އަހަރަކުން، 1 ފަހަރު އެ ޖަމިއްޔާއިން ޝާއިއުކުރާ "ޓޮބޭކޯ އިންޑަސްޓްރީ އިންޓަރފަރެންސް އިންޑެކްސް" ގައި ރާއްޖެއަށް ލިބިފައިވާ ސްކޯ ހިމެނެ އެވެ. މި އިންޑެކްސްގައި، ދުންފަތް ކޮންޓްރޯލްކުރުމުގެ ސިޔާސަތުތަކަކީ ދެފުއްފެންނަ، އިހްލާސްތެރި އަދި ދުންފަތުގެ ސިނާއަތުގެ ނުފޫޒުން ސަލާމަތްވެފައިވާ ސިޔާޔަތުތަކެއްކަން ކަށަވަރުކުރުމަށް އެ ޖަމިއްޔާއިން ކުރާ ދިރާސާތަކުގެ ނަތީޖާ ހިމެނެ އެވެ.

އެވޯޑާ ގުޅޭގޮތުން ސަރުކާރުން ބުނެފައިވަނީ، ރައީސް ދިވެހި ރައްޔިތުން ދުންފަތުން ރައްކާތެރި ކުރުމަށާ ދިވެހިންގެ ސިއްހަތު ރައްކާތެރި ކުރުމަށް ސަރުކާރުން ތަންފީޒުކުރަމުންގެންދާ ސިޔާސަތުތައް ބަލައިގަންނަމުންދާކަން މިފަދަ އެވޯޑްތަކުން ހާމަވެގެންދާކަމަށެވެ.

ރާއްޖެއަށް ލިބިފައިވަނީ ޖީޖީޓީސީން ދެމުން އަންނަ އިންޓެގްރިޓީ އެވޯޑެވެ. މި ޖަމިއްޔާއަކީ ދުންފަތް ކޮންޓްރޯލް ކުރުމަށް އެކި ގައުމުތަކުގައި ތަންފީޒުކުރާ ސިޔާސަތުތަކާއި، އެ ސިޔާސަތުތަށް ތަންފީޒުކުރާގޮތް ދިރާސާކުރާ ޖަމިއްޔާއެކެވެ.