ރާއްޖޭގައި ގޭންގެއްގެ ޝަރުތު ހަމަވާ އެއްވެސް ބަޔަކު ނެތް ކަމަށާއި އެފަދަ ހަރަކާތްތައް ހިންގާ ގްރޫޕްތައް މަދުވެ، އެކަން ހުއްޓިފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައިސް މިފަދައިން ވިދާލުވީ، ސަރުކާރަށް ދެއަހަރު ފުރުމުގެ މުނާސަބަތުގައި ބޭއްވި ހާއްސަ ޖަލްސާގައި ގޭންގުތަކާ ބެހޭ ގާނޫނަށް އަލިއަޅުވާލައްވަމުންނެވެ. ރައީސް ވިދާޅުވީ، ގޭންގެއް ކަމަށް ކަނޑައެޅުމުގައި ގާނޫނުގައި ކަނޑައަޅާފައިވާ ހަމަތަކެއް ހުންނަ ކަމަށެވެ. އެގޮތުން، ފުލުހުން މެދުވެރިކޮށް، ޕީޖީގެ ބައިވެރިވުމާއެކު ކޯޓަށް ހުށަހަޅައިގެން ނޫނީ ގޭންގެއް ކަމަށް ކަނޑައެޅުމުގެ ގާނޫނީ ބާރު ލިބިގެން ނުވާކަމަށް އެމަނިކުފާނު ފާހަގަކުރެއްވި އެވެ.
އަދި، މިފަހުން ހޯމް މިނިސްޓަރާ ސުވާލުކުރެއްވުމުން، ރާއްޖޭގައި ގާނޫނީ ގޮތުން ކަނޑައެޅިފައިވާ އެއްވެސް ގޭންގެއް ނެތްކަމުގެ މައުލޫމާތު ލިބިވަޑައިގެންފައިވާ ކަމަށް ރައީސް ވިދާޅުވި އެވެ. ރައީސް ވިދާޅުވި ގޮތުގައި، މިއީ ގޭންގުތައް ހުއްޓުވުމުގެ ގާނޫނު ވުޖޫދުވުމާ ގުޅިގެން ލިބުނު ބޮޑު ކާމިޔާބީއެކެވެ. އަދި ހަރުކަށިކޮށް ގާނޫނުތައް ހެދުމުގެ ބޭނުމަކީ އަދަބު ދިނުން ނޫން ކަމަށާއި، އެ ގާނޫނުތަކުގެ ބޭނުމަކީ އެފަދަ ކުށްތަކަށް އަރައިގަތުމަށް ހުރަަސްއެޅުން ކަމަށާއި، އެމަނިކުފާނުގެ އުންމީދަކީ ގޭންގު ކުށްތަކުގައި އުޅުނު މީހުން އެ ކުށްތަކާ ދުރުވުން ކަމަށް ވިދާޅުވިއެވެ.
މީގެއިތުރުން ރައީސް ވިދާޅުވީ، މަސްތުވާތަކެއްޗާ ދެވިހިފާފައިވާ މީހުން އަލުން މުޖުތަމައަށް ނެރުމަށް ޓަކައި ރީހެބިލިޓޭޝަންގެ ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ. އެގޮތުން، ޒުވާނުން މަސްތުގެ ހާލަތުގައި އުޅެން ބޭނުންނުވާކަން ފާހަގަކުރައްވަމުން ރައީސް ވިދާޅުވީ، މަސްތުވާތަކެތި އެތެރެކޮށް އޭގެ ވިޔަފާރިކުރާ މީހުންނަށް އިސްލާމްދީނުގައި ކަނޑައަޅާފައިވާ އަދަބު ދެއްވަން ބޭނުންފުޅުވަނީ އޭގެ ސަޕްލައި ހުއްޓުވުމަށް ކަމަށެވެ.
ސަަޕްލައި ހުއްޓުވުމަށްފަހު ދެން ސަމާލުކަންދޭނީ މަސްތުގެ ހާލަތުގައި ތިބި ޒުވާނުން އެއިން ސަލާމަތްކުރަން ކަމުގައި ފާހަގަކުރައްވަމުން ރައީސް ވިދާޅުވީ އެކަމަަށްޓަކައި އާއިލާއާއި މުޖުތަމައުގެ އެއްބާރުލުމާއި އެހީތެރިކަމާއެކު ޒުވާނުންނަށް ފަރުވާ ދިނުމަށް މަސައްކަތްކުރައްވާނެ ކަމަށެވެ.
