ދެމަފިރިންގެ ތެރެއިން މީހަކަށް ސަރުކާރުގެ ސޯޝަލް ހައުސިން ސްކީމަކުން ކުރިން ފްލެޓެއް ލިބިފައިވާނަމަ، އާ ސްކީމެއްގެ ދަށުން ފްލެޓަކަށް ކުރިމަތިނުލެވޭނެ ކަމަށް ކަނޑައަޅައި މާލޭގައި ދިރިއުޅޭ ރައްޔިތުންނަށް ފްލެޓް ދޫކުރުމުގެ އުސޫލު އާއްމުކޮށްފި އެވެ.
އެ އުސޫލު އާންމުކޮށްފައި ވަނީ ރައީސް ޑރ. މުހައްމަދު މުއިއްޒު ސަރުކާރުގެ ބޯހިޔާވަހިކަމުގެ ސިޔާސަތު "ބޯހިޔާވަހިކަން އެންމެންނަށް" އިފްތިތާހުކުރުމަށް ރޭ ބޭއްވި ޖަލްސާގަ އެވެ. އެ ރަސްމިއްޔާތުގައި ޖުމްލަ 15000 ގޯތި ދޫކުރުމަށް ނިންމައި އެކަމާ ގުޅޭ އުސޫލާއެކު، ފްލެޓުތަކަށް ހުށައެޅުމުގެ އުސޫލުވެސް ވަނީ އާންމުކޮށްފަ އެވެ.
ފްލެޓު ދޫކުރުމުގެ އުސޫލަށް ބަލާލާއިރު، ގެނެސްފައިވާ އެންމެ ބޮޑު އެއް ބަދަލަކީ، ދެމަފިރިންގެ ތެރެއިން އެކަކަށް ވެސް ފްލެޓު ލިބިފައިވާ ނަމަ ސަރުކާރުގެ އެހެން ސްކީމަކުން ކުރިމަތިނުލެވޭނެ ކަމަށް ކަނޑައަޅާފައިވުމެވެ. އެހެން ސްކީމަކުން ބޯހިޔާވަހިކަން ލިބިފައިވާ ދެމަފިރިންނަށް ވެސް ފުރުސަތު ލިބޭ ގޮތަށް "ގެދޮރުވެރިޔާ" ސްކީމުގެ އުސޫލުގައި އޮތުމަކީ މި ސަރުކާރުން މީގެކުރިން ފާޅުކޮށްފައިވާ ކަންބޮޑުވުމެކެވެ. އެގޮތަށް އުސޫލު އޮތުމުން ބޯހިޔާވަހިކަން ލިބެންޖެހޭ 600 އަށް ވުރެ ގިނަ އާއިލާ އެ ހައްގުން މަހުރޫމްވި ކަމަށް ސަރުކާރުން ވަނީ ބުނެފަ އެވެ.
ސަރުކާރުން ފްލެޓު ދޫކުރުމަށް ހަމަޖެހިފައިވަނީ ދެ ކެޓަގަރީއަކަށް ބަހާލައިގެން ނެވެ. އެއީ މާލެ ރަށްވެހިންނަށް ހާއްސަ ކެޓަގަރީއާއި މާލޭގައި ދިރިއުޅެމުންދާ އެހެނިހެން ރަށްރަށުގެ ރަށްވެހިންނަށް ކަނޑައަޅާފައިވާ ކެޓަގަރީއެވެ.
ކެޓަގަރީ 1: މާލެ ރަށްވެހިން
- އުފަންވީއްސުރެ މާލެގައި ރަޖިސްޓްރީގައި ޖެހިފައިވާ ފަރާތްތައް
- މާލޭ ރަށްވެހިންގެ ދަފްތަރުގައި ޖެހިފައިވާ ފަރާތްތައް
- ފަހުން މާލޭގެ ގެއެއްގެ ރަޖިސްޓްރީ ޖެހިފައިވާ ފަރާތްތައް
ކެޓަގަރީ 2: މާލޭގައި ދިރިއުޅެމުންދާ އެހެނިހެން ރަށްރަށުގެ ރަށްވެހިން
- މާލޭގައި މެދުނުކެނޑި ދިރިއުޅެމުންދާތާ 15 އަހަރުވެފައިވުން
ފްލެޓް ދޫކުރުމުގެ އަސާސީ ޝަރުތުތައް
- ދިވެހިރައްޔިތެއް ކަމުގައިވުން.
- އުމުރުން 18 އަހަރު ފުރިފައިވުން.
- 400 އަކަފޫޓަށްވުރެ ބޮޑު ބަންޑާރަ ނުވަތަ އަމިއްލަ ބިން ނުވަތަ ގޯތިގެދޮރު މިލްކުވެފައި ނުވުން.
- ރިއަލް އެސްޓޭޓް މާކެޓުން ހައުސިންގ ޔުނިޓެއް ގަނެފައި ނުވުން ނުވަތަ އެފަދަ ތަނެއް ގަތުމަށް އެއްބަސްވެ ފައިސާ ދައްކަމުން ނުދިޔުން.
- ތިމާއަށް ނުވަތަ ފިރިމީހާ / އަނބިމީހާއަށް ކުރިން ސަރުކާރުން ހިންގާފައިވާ ބޯހިޔާވަހިކަމެއް ލިބިފައި ނެތުން.
މީގެއިތުރުން، ޕޮއިންޓް ދޭނެ ގޮތް ވެސް ސަރުކާރުން ވަނީ އާއްމުކޮށްފަ އެވެ.
ޕޮއިންޓް ދޭ އުސޫލު:
- މާލޭގެ ރަށްވެހިކަން ނުވަތަ ދިރިއުޅުނު މުއްދަތަށް.
- އެއާއިލާއެއްގެ ގޯތިގެދޮރުގެ މިލްކުވެރިކަމަށް.
- ގޭބިސީގެ ޖުމްލަ އާމްދަނީއަށް.
- އާއިލާގެ ބެލުމުގެ ދަށުގައިވާ ނުކުޅެދުންތެރިކަން ހުންނަ ފަރާތްތަކަށާއި މައިން ބަފައިންނަށް.
- އާއިލާގެ ހާލަތު.
ފްލެޓު ދޫކުރުމަށް ހަމަޖެހިފައިވަނީ ދެ މޮޑެލް އަކަށް ބަހާލައިގެން އެވެ. ފުރަތަމަ މޮޑެލްއަކީ "އެފޯޑަބަލް ހޯމް އޯނަޝިޕް މޮޑެލް" އެވެ. ފްލެޓަށް ކުރިމަތިލުމުގެ ޝަރުތުތަކުގެ ތެރޭގައި ހައުސިން ޔުނިޓަށް އެދި ހުށަހަޅާ ފަރާތަކީ މާލީ އިދާރާއަކުން ދޫކުރާ ހައުސިން ފައިނޭންސް ފެސިލިޓީއަކަށް ޝަރުތު ހަމަވާ ފަރާތަކަށްވުމާއި ފުރަތަމަ ފަހަރަށް ގެދޮރު ގަންނަ ނުވަތަ މިލްކުކުރުމަށް އެދޭ ފަރާތަކަށްވުން ހިމެނެއެވެ. ދެވަނަ މޮޑެލްއަކީ ރެންޓް ޓު އޯން މޮޑެލްއެވެ. މި ސްކީމަށް ކުރިމަތިލާ މީހުންނަށް މަހަކު ލިބޭ އާމްދަނީ 60،000 އަށްވުރެ މަތިވެގެން ނުވާނެ އެވެ.
އެޕްލިކޭޝަން ހުށަހެޅުމުގެ ފުރުސަތު 04 ޖަނަވަރީ 2026 އިން ފެށިގެން 03 މާރިޗު 2026 ގެ ނިޔަލަށް ހުޅުވާލުމަށް ވަނީ ހަމަޖެހިފަ އެވެ. ފޯމު ހުށައަޅާނީ ސަރުކާރުން ބޯހިޔާވާހިކަމުގެ މަޝްރޫއުތަކާ ގުޅޭ މަސައްކަތްތައް ކުރިއަށްގެންދާ www.hiyaavehi.gov.mv މެދުވެރިކޮށެވެ.
