ހިޔާ އަދި ވިނަރެސް ފްލެޓު ތައް ނިންމުމަށްޓަކައި އާއްމު ފަރާތްތަކުން ނަގާފައިވާ ލޯނުތައް ލުއިކޮށްދޭން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި އެވެ.
ރައީސް ޔާމީންގެ ސަރުކާރުގައި ނިންމާ ހަވާލުކުރި ހިޔާ ފްލެޓުތަކުގެ ފިނިޝިން މަސައްކަތްތައް ގިނަ އާއިލާތަކުން ކޮށްފައިވަނީ ބޮޑެތި ލޯނުތައް ނަގައިގެންނެވެ. އަދި އެޗްޑީސީން ވިއްކި ވިނަރެސް ފްލެޓުތައް ވެސް ލޯނު މެދުވެރިކޮށް ގަނެފައިވެ އެވެ.
ރައީސުލްޖުމްހޫރިއްޔާ މިއަދު ކުރެއްވި ޕޯސްޓެއްގައި ވިދާޅުވީ ހިޔާ ފްލެޓުތަކުގެ ފިނިޝިން މަސައްކަތައް 535 ލޯނު ބީއެމްއެލް މެދުވެރިކޮށް ނަގާފައިވާ ކަމަށެވެ. އަދި ވިނަރެސް ފްލެޓު ގަތުމަށް އެ ބެންކު މެދުވެރިކޮށް 26 ލޯނު ނަގާފައިވާކަމަށް ވިދާޅުވި އެވެ.
އެމަނިކުފާނު ވަނީ އެ ލޯނުތައް ކުޑަކުރުމަށް ނިންމާ އެކަމާ ގުޅޭގޮތުން ބެންކާ މަޝްވަރާކުރެއްވި ކަމަށް ވިދާޅުވެފަ އެވެ. އެ މަޝްވަރާގެ ތެރޭގައި ހިޔާ ފްލެޓް ތަކުގެ ފިނިޝިން ލޯނަށް މިހާރު ކަނޑައަޅާފައިވާ އިންޓްރެސްޓު ރޭޓް %12 އިން %10 އަށް ކުޑަ ކުރުމަށް ބީއެމްއެލް އަށް އަންގާފައިވާ ކަމަށާއި، ލޯނު ދެއްކުމަށް ދަތިވެ ޑީފޯލްޓް ވެފައިވާ ފަރާތްތައް ރެގިއުލަރައިޒް ކުރެވޭނެ ޕޭމަންޓް ޕްލޭނެއް ހެދުމަށް ވެސް އަންގާފައިވާ ކަމަށް ވެސް ރައީސް ވިދާޅުވި އެވެ.
އެމަނިކުފާނު ވިދާޅުވީ ވިނަރެސް ފްލެޓް ގަތުމަށް ދޫކޮށްފައިވާ ލޯނަށް މިހާރު ކަނޑައަޅާފައިވާ ޕްރޮފިޓް ރޭޓް %9 އިން %8 އަށް ކުޑަ ކުރުން، އެއީ ކުރެވިދާނެކަމެއްކަމަށް ބޭންކް އޮފް މޯލްޑިވްސް އިން މަޢުލޫމާތު ލިބިފައިވާތީ، އުސޫލުގެ ތެރެއިން އެކަން ކުރުމަށް ވެސް އަންގާފައިވާ ކަމަށް ރައީސް ވިދާޅުވި އެވެ.
ސަރުކާރުން މީގެ ކުރިން ވެސް ވަނީ ހިޔާ ފްލެޓުގެ ކުލި ދެފަހަރަކު ކުޑަކޮށްފަ އެވެ.
