މާލެ ސަރަހައްދުގެ ބޯހިޔާވަހިކަމުގެ މައްސަލަ ހައްލުކުރުމަށްޓަކައި ހިންގާ ރަސްމާލެ މަޝްރޫއުގެ ދަށުން ބިން ހިއްކާ ނިންމުމުގެ ކުރިން ގޯތި ލިބޭ މީހުން ކަނޑައަޅައި ނިންމާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް ޑރ. މުއިއްޒުގެ ސަރުކާރަށް ދެ އަހަރު ފުރުން ފާހަގަކުރުމުގެ ގޮތުން ރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ރަސްމާލެ މަޝްރޫއުގެ މަސައްކަތް ހަލުވިކަމާއެކު ކުރިއަށްގެންގޮސް 5 މަސް ދުވަހުގެ ތެރޭގައި ބިންހިއްކާ ނިމޭނެ ކަމަށެވެ. އެ މަޝްރޫއުގެ ބިން ހިއްކުމުގެ މަސައްކަތް އަލުން ފަށާފައިވަނީ މިދިޔަ ހޯމަ ދުވަހު އެވެ.
ރައީސް ވިދާޅުވީ، ބިން ހިއްކާ ނިމުމުގެ ކުރިން އެތަނުން 15،000 ގޯތި ލިބޭ މީހުން ކަނޑައަޅަނެ ކަމަށެވެ. އެގޮތުން އަންނަ ހަފްތާގައި އުސޫލުތައް އިއުލާނުކުރެވޭނެ ކަމަށް ވިދާޅުވި އެވެ. އެމަނިކުފާނު ވިދާޅުވީ މާލޭގެ ރަށްވެހިންނާއި މާލޭގެ ރައްޔިތުން ހިމެނޭ ގޮތަށް ގޯއްޗަށް ކުރިމަތިލުމުގެ ފުރުސަތު އޮންނާނެ ކަމަށެވެ.
ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ ޕްރައިވެޓް ލިމިޑެޓް (ސީއެމްސީ) އާ ހަވާލުކޮށްގެން ކުރިއަށްގެންދާ އެ މަޝްރޫއުގެ ދަށުން ޖުމުލަ 63 ހެކްޓަރުގެ ބިން ހިއްކާނެ އެވެ. މި މަސައްކަތް ކުރިއަށްގެންދަނީ ބޮސްކާލިސްގެ 22,000 ސީ.ބީ.އެމްގެ ޑްރެޖަރެއްގެ އެހީގައެވެ. މި މަޝްރޫއުގެ ދަށުން މިހާތަނަށް 24 ހެކްޓަރުގެ ބިން ހިއްކާފައިވެ އެވެ.ގެދޮރުވެރިކަމުގެ އިތުރުން އެ ސަރަހައްދު ބޭނުންކުރާނީ، ސިނާއީ ބޭނުންތަކަށާއި މެރީނާގެ ބޭނުމަށެވެ.
މީގެއިތުރުން، ސަރުކާރުން ހިންގާ ބިންހިއްކުމުގެ އިތުރު މަޝްރޫޢުތައް އަވަސްކުރުމަށް ނޮވެމްބަރު 23 ވަނަ ދުވަހު ޑްރެޖަރު އަންނާނެ ކަމަވެސް އެމަނިކުފާނު ވިދާޅުވި އެވެ. އެއާއެކު، ގިރާވަރު ފަޅު ހިއްކުމުގެ މަސައްކަތް ވެސް ކުރިއަށްދާނެ ކަމަށް ވިދާޅުވި އެވެ.
